Ostoro əhali sərhədi oj bə umon

Azərboyconədə hışkə ro sərhədon 2020-minə sori martə manqiku dəbastə bən. Bəvədə bımi səbəb dınyoədə pevolo bə koronovirus pandemiya be. Imruj Azərboycon dınyoədə yekqanə keşvəre ki çə fəxtonəku istə sərhədonış bastə oğətə.

İlham Əliyev 2023-minə sorədə votəş be ki, milli əmniyyətəti həmmə əlidə hisson, səbəbonku barz bənine.De çəy fiki, sərhədon bastə mande keşvəri əmniyyətəti ğoym kardə.

Sərhədətrofi ərazionədə jiyə vətəndoron veyni ro sərhədon oj nıkarde çəvon hiçən fər nıbə maddi holi həniən qıvonin kardə.Ostoro rayoni Arçon di əjiyon veyni hışkə ro sərhədon dəbastə beku norozin.

Di əji Həsən Məmmədov təğauddore. Əv votedə ki, çəy sə təğaud bə 10-15 ruj dezzuy rəsedə. Marketonədə ğıyməton bohon və şe-şeyən boho bedən. Hışkə ro sərhədon oj bə fəxtonədə həmdivojon İroniku vardə molon hırye erjon bə sə qınidə be.

Çe İroniku de vardə ərzağ, parfumeriya, qiqyenik vasiton istə xeyzoni oğətə Akif Babayev holiədə hiç qılı ko nıbe, hışkə ro sərhədon bastə be vətəndoron həm erjon, həmən keyfiyyətinə məhsulonkuş məhrum karde votedə.74 sininə Xanoğlan Tağıyev bə holiədə bə vəziyyəti “dastqirxonə” votedə. Əvən navko çe İroniku bə munasib ğıymət mol vardə xonəxonədə qılıye.Əv, həmən bə Rusiya bo müalicə se ro eçın qəte, əmmo təyyarə səyahəton ğıymət vey barz beku ıştə mualicə dəvom karde nızne səbəb be votedə.61 sininə Minayə Məmmədova, hələ təğaud sinədə nıbe, noxəşə holədə de limon həvate ıştə əmr-əməli dəvone iddio kardə.Hışkə ro sərhədon oj bə fəxton çəy əğlonən de ironiku vardə ğənd, çay və əlidə molon savdı məşğul bən.Hışkə ro sərhədon dəbastə mande bə əhali bekoəti, ğəzənci bə minimum eqıniye səbəb bə.De moy həvate məşğul bə Quləğə Abdullayev savdı fər nıbeku noroziəti kardə.Vəziyyəti tosə oxo bə sə dınıqıniyə kali xonəxon, hışkə ro sərhədon bastə be İroniku narkotik vasiton varde vəy qəte iddio kardən.