Məhbusi huğuğon darıştə bedən

15 numrəninə cəzokəşə muəssisədə oğətə "xeberman.com" sayti rəhbər Polad Aslanov rəis mıavini kabinetiku və de çəy iştiroki bə əvlodon zang je məcbur kardə bedə.

Aslanov ımi bənə şəxsi jimon huğuği darışte zınedə.
Bın barədə çəy jimoni həmro Qulmirə Aslanova xəbə pevoloş kardə.
De çəy sıxani, Polad noyabrədə vəşyənəti elon kardə bədiqə 1 numrəninə cəzokəşə muəssisəku bə 15 numrəninə cəzokəşə muəssisə ovoştonə bə.
"Cəzokəşə muəssisə rəisi bəyonış kardə ki, ışət bə istə əvlodon zanq rəis və ya rəis mıavinini kabinetonku bəbe. Polad oğətə şəraiti fər nıbeku qəp je bino kardə cəğe əloqə bırniyə bedə", - çəy jimoni həmro votəşe.
Polad oğətə şəraiti fər nıbe barədə 21-24 yanvar tarixonədə sə qətə vindemononədə voteş zınə. Cəzokəşə muəssisədə bo 1146 kəsi nəzədə qətə vırədə 1500 məhbus oğətə bedə. 
Hıtə vırə nırəse ro kali məhbuson zəminisə hıtedən. 
Polad həmən cəzokəşə muəssisə həmomədə tat ovi nıbe, həmomi sard be, məhbuson normal dənışte nızne bəyonış kardə.
Qulmirə.Aslanova de jimoni həmro şikoton bə ombudsmane ovardə. 
Çımi navədən huğuğ mıdafiəvonon tərəfo bənə siyosi məhbusi zınə bə bloqqer Rəşad Ramazanovən 15 numrəninə cəzokəşə muəssisədə məhbuson huğuğon darışte və şəraiti fər nıbe bəyonış kardə be.
Polad Aslanov 12 iyun 2019-minə sor tarıxədə de bə İroni xeyr casusəti ittihomı de CM 274-minə (bə devləti xəyonət) maddə dastqir kardə bə. 
Əv, 16 sor ozodətiku məhrum kardə bəbe.
Aslanov ın ittihomon rədd kardə, xususi xıdmət orqani koəkon miyonədə korrupsiya fakton ifşo karde ro dastqir be iddio kardə.
Huğuğ mıdafiəvonon əy bənə siyosi məhbusi zınedən. 
Peşo Ali Məhkəmə çəy dastqirəti mıddət bə 13 sor eğandəşe. 
AİHM çəy dastqirəti beğanuni be ro təzminot təyin kardəşe.