İqbal Əbilovi ko bə məhkəmə vığandə bə

Azərboyconədə dastqirətiədə bə tolışə alim, tədğiğatəkə İqbal Əbilovi koy ro ibtidoi istintoğe bə orəx rəse bəyon kardə bə.

Bın barədə tədğiğatəkə vəkil Fariz Namazlı məlumot doəşe. De vəkili doə məlumoti, Əbilovi ıştən iyən vəkilon de koy materialon oşnə bən.
Cinoyət ko bo diyə karde omə həftə (17-23 fevral) bə Boku Qonə Cinoyəton Məhkəmə vığande çəş kardə bedə.
Belarusəda jiyə İqbal Əbilov 2024-minə sor iyuli 22-də bə Azərboycon əvlodon vəyə omə fəxt qətə bə.
Azərboyconədə de milli kamiyon, əz cumlə de tolışon band tədğiğat bardə etnoqraf İqbal Əbilovi barədə 2024-minə sor iyuli 24-də Səbail Rayon Məhkəmədə bo sıftənə istintoğ mıddəti ro 4 manq dastqirəti ğətimko tədbir vıjniyə bəbe. Peşo dastqirəti mıddət dıroz kardə bə.
Tolışə alim İqbal Əbilov de Cinoyət Məcəllə 274 (bə devləti xəyonət), 281.3 (bə devləti əleyh oşkoə vanqon –de xarici təşkiloton və de çəvon numayəndon asparde kardeədə) və 283.1- (milli, irği, sosial və ya dini nifrət və deşmenəti eğande) maddon ittihom kardə bedə.
İqbal Əbilov de Erməniston xususi xıdmət orqanon koədə, rozi bə şəkilədə Azərboyconədə milli zəminədə nifrət eğande cəhdədə ittihom bedə.
De İqbal Əbilovi əvlodon doə məlumoti, əv ın ittihomon ğəbul kardə ni, ıştəni taxsiko zınedə ni.
Əv, holiədə Devlət Əmniyyətə Xıdməti (DTX) istintoğ təcridxonədə oğətə bedə.
İqbal Əbilov Latviyadə çe ğeydiyyato dəvardə Tolış Milli Akademiya təsisəkəye.