Jurnalist Şəmşad Ağa de “Meydan TV ko”  band qətə bə

Fevrali 4-ku bə 5 ovaştə şəv "arqument.az" sayti sər redaktor, jurnalist Şəmşad Ağayev (Ağa) qətə bə.

De çəy boə Şahid Ağayevi bəyon karde, bə şəv, saat 2-də mıstəntığ iyən 7-8 kəs maskaninə polison çəy Boku şəhərədə jiyə kədə nəvəy tədbirşon bə jimon dəvonə:
“Polison bə çəmə kə dəşin, bə har vırə nəvin. Şəmşadi kanə telefon, çımı telefon, yoddaş karton,  kanə diskon, komputer, modem, jurnalist vəsığəşon peğəte, protokol onoşone. Şəmşadi iqlə ımış vote ki, əvşon qətə” – çəy boə bəyonış kardə.
De vəkil Şəhla Himbətova sıxani, Şəmşad Ağa de “Meydan TV ko”y  anqıl de Cinoyət Məcəllə 206.3.2- (ğaçaqmoləti — navədə daşt-bədast bə i dastə xonəxon tərəfo kardeədə) maddə bənə şəkkinə xonəxo qətə bə.
Ponə sor iyuli 5-də jurnalist Şəmşad Ağa Boku Şəhər Sər Polis İdarədə de “Toplum TV ko”y ro bənə şoydi damə kardə bə be. İstintoğ orqani şifahi formədə, bə çəy azərboyconiku beşe ğədəğə noe bəyonış kardə be.
2024-minə sor dekabri 6-də Meydan TV koəkon Ramin Deko (Cəbrayilzodə), Aynur Qənbərova (Elqunəş), Aysel Umudova, Aytac Əhmədova (Tapdığ), Xəyalə Ağayeva, Natiq Cavadlı dastqir kardə bən. Əvon de Cinoyət Məcəllə 206.3.2- (ğaçaqmaləti , navədə daşt-bədast bə i dastə xonəxon tərəfo kardeədə) maddə ittihom bedən. De ım maddə bo istintoğ mıddəti ro çəvon barədə 4 manq dastqirəti ğətimko tədbir vıjniyə bə.
De Meydan TV koəkon hejo həmonə ruji vətəndor cəmiyyəti uzv Ulvi Tahirovən qətə, çəy barədən 4 manq dastqirəti ğətimko tədbir vıjniyə bə. Ulvi Tahirovi bə Meydan TV  aidiyyətış ni.