"Abzas Media” dastqirətiədə bə koəkon bə məhkəmə omeku imtino kardəşone

Fevrali 11-də Boku Qonə Cinoyəton Məhkəmədə de “Abzas Media” nəşri band cinoyət koy ro dastqirətiədə bə 7 jurnalisti məhkəmə dəvom kardı bəni be. İntasi jurnaliston veyni bə çəvon vəynə zorakiəti və və rəftori etiroz, bə məhkəmə omeku imtino kardəşone.

De hakim Rasim Sadıxovi sərdorəti dəvonə məhkəmə prosesədə təxsikorə xonəxonədə 3 kəs – “Turan” informasiya aqentəti iqtisadiyyat şebə redaktor Hafiz Babalı, “Azadlıq” radio koəkə Fərid Mehralızadə iyən “Abzas Media” koordinator Məhəmməd Kekalov iştirok kardəşone.
Mandə 4 kəs – “Abzas Media təsisəkə və sər direktor Ulvi Həsənli, sər redaktor Sevinc Vaqifqızı (Abbasova), jurnaliston Elnarə Qasımova iyən Nərqiz Absalamova bə məhkəmə omeku imtino kardəşone.
Fərid Mehralızadəən bə məhkəmə de zu, təcridxonə koəkon tərəfo kameradə daşt epıştə, məcburi vardə be iddioş kardə.
Fərid Mehralızadə məhkəmədə bəyonış kardə ki,  çəy de vəkili və ya əvlodon vinde bardeədə əqəm həmonə fəxt dəhlizədə dastqir bə jurnalistonədə vardedənbu, əvon iyəndı nıvinde ro niyo kardən. Əvoni hətto bə  Boku Qonə Cinoyəton Məhkəmədə vardeədə iyəndıku co-co vardən. 
Əy, votəşe ki, əqəm joğo dəvom bıko omə məhkəmə prosesonədən iştirokiku imtino bəkardemon.
Məhkəmə proses tosə fevrali 18 bə təxir eğandə bə.
De “Abzas Media” koy anqıl dastqirətiyon 2023-minə sor noyabri 20-ku bino bə.