Azərboyconədə siyosi məhbuson hisob bə 357 kəsi rəsə

Azərboyconədə Siyosi Məhbuson ozodəti ro İttifoği keşvərədə bə siyosi məhbuson nuə siyohiş oşko kardə. Siyohiədə 357 kəsi nom  dəvardə.

De onomoni 2024-minə sor dekabri 12-də təğdim kardə siyohı moğayisədə 26 kəsi nom ziyod kardə bə.
Çəvon dılədə jurnaliston Fərid İsmayılov, Şəmşad Ağa, Şahnaz Bəylərqızı iyən İmişli iğtişaşonədə dastqir kardə 13 kəs və əlidəyon hıstin.
Nuə siyohi bə 12 vırə poə kardə bə:
-jurnalist və bloqqeron – 27 kəs;
-huğuğ mıdafiədoron – 4 kəs;
-mıxalifət partiya və vətəndor cəmiyyəti uzvon – 32 kəs;
-milli kamiyon fəolon – 4 kəs;
-bə muharibə əleyh fəolon – 2 kəs;
– “Seyudli di koy” ro – 2 kəs;
– Almaniyaku deportasiya bə siyosi muhaciron – 5 kəs;
– dindoron – 235 kəs;
-“Tərtər koy” ro məhkumon – 8 kəs;
-“Qəncə koy” ro məhkumon – 13 kəs;
– tosə jimoni oxo dastqirbəyon – 11 kəs.
-“İmişli koy” ro dastqiron – 13 kəs,
Siyohi Sulh və Demokratiya İnstituti direktor Leyla Yunus və Siyosi Məhbuson Monitorinq Mərkəzi rəhbər Elşən Həsənovi tərəfo, de Avropa Şura Parlament Assambleya (AŞPA) 2012-minə sori oktyabrədə dəvardə sessiyadə ğəbul bə 1900 numrəninə mıvafiğ ğətnomədə muəyyən kardə bə “siyosi məhbus” kriteriyon əsos hozzo kardə bə. Siyohidə ən vey dindoron, 235 kəs, be bə nəzə qınidə. Im dastqir bə dindorə fəolon kamə hissəye. Əvon həmmə ya de narkotik, yaan bə ironi çəsusəti nomi pesoxtə ittihomon dastqir kardə bən. Siyohidə bə de milli kamiyon nomi dastqir bəyon çoyninən tolış mərdumi numoyəndonin.