Bo “SalamNews” iyən “İnterAz”i rəhbəri hukm handə bə

“SalamNews” informasiya aqentəti iyən “İnterAz”i rəhbər Mətləb Bağırovi cinoyət koy ro məhkəmə proses bə orəx rəsə.

Boku Qonə Cinoyəton Məhkəmədə dəvonə prosesədə bo əy hukm handə bə.
Prosesədə sıftə çəy vəkili qəpış jə.
Vəkili, cinoyət koədə nom qətə kali kəson damə kardə nıbe bəyonış kardə:
 “Bın koədə nom dəvardə H.Kefsiz, N.Kaya və əlidə xonəxon məhkəmədə damə kardə bənin. De ımi band çəmə vəsotəton təmin kardə bənin. Mıvəkkil de kali maddon ıştəni taxsiko zınedəni. Xahiş kardəm, bə əy bəroət doə bıbo”.
Mətləb Bağırovi vəkil de mıdafiə kardə xonəxo məhkəmədə kardə rəftoriən bə nəzə se rico kardəşe.
Mətləb Bağırov istə oxonə sıxanədə, hakimonku ədolətinə ğəror doe xahiş kardəşe:
“Məhkəməku xahiş kardəm ki, bə mı bəroət doə bıbo. Bə həmməy təşəkkur kardəm. Bın mıddətədə çımı əziyyəti kəsə koqəron və vəkiliən təşəkkur kardəm”.
De bekardə hukmi, bə Mətləb Bağırov de 3 sor jurnalistika və həmmə İnformasiya Vasiton sahədə fəoliyyəti ğədəğə 12 sor mıddət ozodətiku məhrum kardə cəzo doə bə.
Devlət ittihoməkə çəy 13 sor mıddət ozodətiku məhrum karde piyəş be.
Bənə Hacı Mətləbi zınə bə Bağırov Mətləb Mirzəmmədi zoə 2023-minə sor yanvari 30-də Devlət Əmniyyətə Xıdməti bardə cinoyət koy ro dastqir kardə bəbe. Cinoyət koədə zərərkəşə tərəf İğtisodiyyat Vəzorəti Maliyə xıdmət zınə bıboən, Mətləb Bağırov ittihomon ğəbul kardə ni və ıştəni taxsiko zınedə ni.