Jurnalist Fatimə Mevlamlı dastqir be

Jurnalist Fatimə Mevlamlı dastqir be barədə, marti 1-də Xətai Rayon Məhkəmədə istintoğ orqani təğdimoti əsnoədə ğəror ğəbul kardə bə.

Məhkəmədə iddio kardə bə ki, jurnalisti kədə bardə nəvəy tədbirədə lefçə jintono 13500 avro pul peydo kardə bə.
Məhkəmə edaştə təğdimotış təmin kardə.
Çəy barədə 1 manq 9 ruj mıddət dastqirəti tədbir vıjniyə bə.
Fevrələ manqi oxominə rujədə qətə bə Fatimə Mevlanlı de Cinoyət Məcəllə 206.3.2-minə (ğaçağmoləti, navədə daşt-bədast bə i qrup xonəxon tərəfo kardeədə) maddə ittihom kardə bedə.
De DKV-i mətbuat xıdməti pevolo kardə məlumoti, jurnalist “Meydan TV”  koy anqıl cinoyət koy ro qətə bə.
2024-minə sori dekabri 6-də Meydan TV kodaron Ramin Deko (Cəbrayılzadə), Aynur Qənbərova (Elqünəş), Aysel Umudova, Aytac Əhmədova (Tapdıq), Xəyalə Ağayeva, Natiq Cavadlı qətə bən. Əvonən de ğaçağmoləti maddə ittihom kardə bedən. Dın maddə çe əvon barədə bo istintoğ mıddəti ro 4 manq dastqirəti ğətimko tədbir vıjniyə bə.
De Meydan TV kodaron eyni rujədə vətəndor cəmiyyəti uzv Ulvi Tahirovən qətə bə. De eyni ittihomi çəy barədən 4 manq dastqirəti ğətimko tədbir vıjniyə bə. Ulvi Tahirovi bə Meydan TV aidiyyətış nı.
Fevrali 5-də “arqument.az” sayti sər redaktor, de Meydan TV həmkoəti kardə jurnalist Şəmşad Ağayev (Ağa) qətə bə. Çəy barədə 2 manq 1 ruj mıddət dastqirəti ğətimko tədbir vıjniyə bə.
Fevrali 20-də jurnalist Nurlan Libre (Qəhrəmanlı) de “Meydan TV” band cinoyət koy ro qətə bə. De məhkəmə ğərori çəy barədən 1 manq 17 ruj mıddət dastqirəti ğətimko tədbir vıjniyə bə.
Dastqir bə jurnaliston kəonədə nəvəy tədbir dəvonə bə, telefonon, kompyuteron və əlidə şəxsi əşyon peğətə bən.
Dastqir bə jurnaliston ıştəni taxsiko zınedənin, Meydan TV bardə tənğıdi fəoliyyəti ro cəzo se bəyon kardedən.
Holiədə de anoloji ittihomon 30-sə vey jurnalist, ictimoi fəol dastqir kardə bən. Əvonən ittihomi ğəbul kardə nin, de jurnalist fəoliyyəti anqıl dastqir be votedən. Hakimiyyət keşvərədə de siyosi motivi dastqirəti nıbe bəyon kardə.