Bə İqbal Əbilovi məhkəmə oj dəvone vəsotati rədd cəvob

Lankoni Qonə Cinoyəton məhkəmə tolışə tədğiğotəkə İqbal  Əbilovi vəkilon məhkəmə prosesi oj dəvone barədə ros kardə vəsotat rədd kardəşe.

De İqbal Əbilovi mıdafiyə komitə bəyon karde, məhkəmə bastə dəvone, bə çəy durust dəvone şəkkon vardə. 
Əbilov de vey qonə maddon- bə devləti xəyonət, milli nifrət iyən de xarici onemonon asparde maddon qinıko zınə bedə. De ın maddon əv tosə jimoni oxo dastqir be bəzne. Əv ıştəni taxsiko zınedə ni. Fevrali 18-də Əbilovi ko bə Lankoni Qonə Cinoyəton məhkəmə doə, fevrali 26-dən məhkəmə alimi bə kə dustoğəti vadoe ro doə vəsotətış rədd kardə. 
Əbilovi mıdafiyə komitə iyən əvlodon dastqirəti səbəbi tolış fərhənqi tədğiğədə vindedən. De huğuğ mıdafiyəkon fiki, bə İqbal Əbilovi vəynə doə ittihomon hiç qılı əsos nışone və azərboyconədə milli kamiyon həxon praktikədə darışte sobut kardə.
De vəkili sıxani, bə Lankoni Qonə Cinoyəton məhkəmədə şə prosesi Əbilov iyən vəkilon de video Boku 1 numrəninə təcridxonəku umjən qıniyən. Vəkilon ros kardə vəsotaton təmin kardə bə nin. 
Məhkəmə taxsi elon karde bədiqə bə Əbilovi bo ifodə ro sıxanış doə, əmmo əy bo qəpi hozzo be ro fəxtış piyə. Məhkəmə istə koy apreli 4-də dəvom bəka.