Azərboyconədə bə Devlət informasiya resurson kiberhucumon bən

Azərboyconədə çandi-çand ruje ki bə devlət informasiya resurson DDoS yəni xıdmətiku imtino hucumon be xəbə doə bedə.

De Xususi Robitə və İnformasiya Əmniyyətəti Devlət Xıdməti doə məlumoti, kiberhucumon vəy qəte səmtədə koon bardə bedən.
Azərboyconədə bə devlət onemonon rəsmi sayton dəşe mumkun nıbe votə bedə.
Xususi Robitə və İnformasiya Əmniyyətəti Devlət Xıdməti məlumotəda, de hucumi band real İP (İnternet protokol) unvononən bənə anomal trafiki bə blok siyohi eqıniye ehtimol be ğeyd bə .
“Anomal trafiki rıtə fəxt, devlət informasiya resursonku istifodə kardə vətəndoron, bə əvon məxsus İP unvononədə bə miyon beşə kırtəmıddətinə mıvəğğəti blok holon bə nəzə se rico bedə”, – məlumotədə votə bə.
Fevrali 20-dən Azərboyconədə bə kali xəbə sayton həmməyəvo haker hucumon bən.
Bə hucum məruz mandə İV-on “Global Media Group”, “Report” İnformasiya Aqentəti, “Oxu.az.",“Media.az”, “Baku.ws”, “Caliber.az” , “Baku TV” internet televiziya,  “Azpolitika.info” sayton bən.
Hakeron bə hucum kardə sayton əsos səhifonədə “Azərboycon İslam Mığavimət Hərəkat”i  “Huseyniyon” nomədə qrupi loqo noəşon be.
De kali eksperton sıxani ın hucumon "Huseyniyon" qrupi tərəfo ne, azərboyconi dıləədə devlət onemonon tərəfo təşkil bən.