Azərboyconi hokumət bə jurnalist Aytac Əhmədova təzminat bədo

Avropa İnson Həxon Məhkəmə (AİHM) marti 11-də de Azərboyconi band qılı ğərorış oşko kardə.

Çe ımi navədə Avropa İnson Həxon Məhkəmə“Azadlıq” qəzeti pevolo direktor, AXCP sərdori koməkəkə Faiq Əmirli dastqirəti ro Azərboycon hokumətış 7500 avro cərimə kardə be.
AİHM-də ğəror bekardə əlidə ko de jurnalist Aytac Əhmədova şikoti bande.
De ərızəvoni iddio, 2015-minə sori sentyabrədə de Meydan TV kodarati karde ro Dılətonə Koon Vəzorəti Mıtəşəkkil Cinoyətkoəti Mıbarizə İdorə şe məcbur kardə və əyo xəbə portal, de çəy fəoliyyəti bandı damə-dini kardə bə. DKV koəkon hiç qılı order və ya məhkəmə ğəror nıbə çəy mənzılədə nəvəy tədbir bardəşone, kompyuterşon peğətə, çəy kali şəxsi fotoşəkil və video materialon de saxta nomon “Facebook”ədə pevoloşon kardə. Pevolo bə materialon çe ərızəvoni zıvono de təhğiri nıvıştəyon muşayiət kardə bən.
Ərızəvon Avropa İnson Huğuğon Konvensiya 6-mınə (ədolətinə məhkəmə huğuğ) və 8-minə (bə şəxsi və xeyzon jimoni hurmət huğuğ) maddon əsos hokumət orqanon çəy şikoton təmin nıkarde iddio kardəşe.
Məhkəmə bın koədə bə ərızəvoni mınasibətədə Konvensiya 8-minə (bə şəxsi və xeyzon jimoni hurmət huğuğ) maddə darıştə be ğəror doəşe. Bə ğərori əsos, hokumət bə ərızəvoni mənəvi zərər və xarci əvəz 5 həzo 500 avro doəniye.
2015-minə sori sentyabri 16-də mıstəğıl jurnalist Aytac Əhmədova kuçədə qətə, bə DKV Sər Mıtəşəkkil Cinoyətkoəti vəynə Mıbarizə İdorə bardə bəbe. Əv, de Meydan TV  kodarəti kardeədə qınoko zınə bə.
2024-minə sor dekabri 6-də Meydan TV-i jurnaliston polisi dəvonə əməliyyoti nəticədə qətə bən.
Bə jurnaliston har qılə de Cinoyət Məcəllə 206.3.2-minə (ğaçağmoləti, navədə daşt-bədast bə i qrup xonəxon tərəfo kardeədə) maddə ittihom bə nav doə bə.
Dekabri 8-də jurnaliston barədə 4 manq dastqirəti ğətimko tədbir vıjniyə bə.
Jurnaliston ittihomon rədd, bə jurnalist fəoliyyəti ro dastqir be, de peşə fəaliyyəton band de təzyiğon dim-bədim mande bəyon kardən.