Afiəddin Məmmədovi barədə hukm zuədə mandə

Məhkəmə prosesədə Penitensiar Xıdməti se koəkə əvşon de zu bə şışə kabinə dənoə

Apreli 9-də Boko Apelyasiya Məhkəmədə “Kodorə Miz” Həmkoə İttifoğon Konfederasiya sərdor Afiəddin Məmmədovi apellyasiya şikoti diə kardə bə.
Afiəddin Məmmədovi məhkəmədə qəpış jə.
Əv, istə qəpi koğəziku handeədə hakim Faiq Ğəniyevi çəy sıxanış nimədə oğətə və “məhkəmə prosesi bə səhnə peməqordon, emosionaləti karəş, de mahiyyəti qəp bıjən” sıxanonış bey kardə.
Afiəddini istə qəp de “Bıjiyo kodaron mıbarizə!” oroxnəşe. Həmonə məğam Penitensiar Xıdməti se koəkə  Afiəddin Məmmədovi dasto koğəzşon de zu sə, əvşon məhkəmə zalədə şişə bə kabinə dənoə.
Peş hakimi mıdaxilə nəzorətəvonon koğəzşon bə vəkili ne, bə hakimi təğdim kardəşonei. Koğəz bə ko materialon ziyod kardə bə.
Prosesi oxoədə Bokı Apelyasiya Məhkəmə şikotı zuədə oğətə ğəror doəşe və iminə instansiya məhkəmə hukmış ğıvvədə oğətə.
Vəkil Zibeydə Sadıqova bə Ali Məhkəmə şikot karde eçın qəte bəyonış kardə.
Afiəddin Məmmədov 2025-minə sori yanvari 14-də de Boku Qonə Cinoyəton Məhkəmə hukmi bə 8 sor mıddət ozodətiku məhrum kardə bə.
Əv de Cinoyət Məcəllə 126.2.4 (zıne-zıne qonə xəsorət je-de xuliğanəti niyyəti kardeədə) və 221.3 (xuliğanəti – siloh və ya siloh ğismədə bə əşyoku istifodə karde) maddon ittihom bə.
İctimoi fəol Afiəddin Məmmədov navədən bə polisi mığavimət ittihomi 2-3 kərə dastqir bəbe. Əmmo əv, ın ittihomon pesoxtə be, de ictimoi fəoliyyəti anqıl cəzo se bəyon kardəş be.
2023-minə sor avqusti 1-də Kodorə Miz Həmkoə İttifoğe Konfederasiya uzvonədə i dastə moped romə kuryeron bə ico  polison çəvon nəğliyyat vasiton bə cərimə meydonçə barde etiroz kardəşon be.
Etiroz aksiya orəxə bə peş Afiəddin Məmmədov jimon kardə kəy nezi dastqir kardə bəbe,  30 sutka inziboti cəzo səş be.
 30 sutka cəzo bə orəx rəşə bə peş, avqusti oxoədə bə ozodəti vadoə bıboən, sentyabri 20-də ikərən dastqir kardə bə.