Tolışə mətbuati tojə numron
Im həftə Tolışə mətbuati - "Tolışon sədo" rujnomə, və "Aləm" mahnamə (jurnali) tojə numron çe çapo beşən.
"Tolışon sədo" sıftənə səhifədə Liki rayonədə devləti məmuron bə Tolışə zıvoni nəinki tədrisi, hətto bə cey mevcudiyyəti əleyh bardə siyasəti barədə vey aktual qıley məğalə dərc bıə. Liki Vizəzəmin diy məktəbi timsalədə bə Tolışə dərson dəvunie, Tolışiədə qəp je ğədəğə noe fakton bə əhandon nəzər rosniə bedə. Hətto Respublika Parlamentədə Liki deputat İğbal Məmmədoviən de Rayoni İcra Hakimiyyəti sərdar Revşən Bağırovi bahəm ım antitolışə kompaniyadə fəal içtirak kardeyən məğalədə ğeyd bedə.
Sərredaktor Rafiğ Cəlilov ıştə "Tolışi həlolə həx" nominə məğalədə çəmə milləti ictimai-siyasi jimoni problemon barədə nıvıştəşe. Əv bə Respublika Sər Prokurotura Qonə Cinayəton dair İstintağə idarə vanq karde, əyo bey doə sualon və ıştə bə sualon doə cəvobon bə əhandon nəzə rosnidə. Əhandon çe Əli Nasiri 62-minə yubileyi, həmən çe Tolışə Milliə Hərəkati fəal axund Əli Rzayevi bə rəhmət şe barədə dılvandiən rujnomə səhifonədə hande bəzınen.
Bı səhifonədə tojə müəfllifon - Fuad Mondiqovoj, Heydərov Maxsun, Rufət Mondiqo, Famil Şivəxani, Əlimərdan Şukurzadə, Əvəz Nəsirzodə, Cabir Nəsiri, Elmas Hidayəti şeer və məğalonən ıştə vırə qətəşone.
"ALƏM" mahnamən ım sornə 3 -minə nümrə çe çapo beşə. Jurnali ım nümrə dəvardə nümrəonsə fərğinə cəhət əve ki, 56 ne, 76 səhifəy. Sıvo bımi, jurnali bı nümrədə bə Tolışi aid ve marağinə tojə nıvıştəyon, məğaləon hestin. Eyən məxsusi ğeyd karde lozime ki, Im mahnamə çe tolışə xalği navğədəmə ruşinəfikir de Vuğar Həmati rəhbərəti və şəxsi təşəbbusi ofəyə bedə. Tosə ısət 7 numrəş bə əhandon edaştə bıə. Çey har səhifəş de Tolışə ədəbiyyati və tarixi barədə nıvıştəyon qəncine.
