Tolışon TMMR 24-minə sorəqardış ğeyd kardışone
1993-minə sori avğustə manqi 7-minə ruji Lankonədə Tolışə Xalqi Məçlis qırdə bıe. Bı Məclisədə Tolışıstoni 7qılə rayoni səlahiyyətinə numayəndon iştirakşon hestbe. Əyo bə ğəror omin ki, Az.R tərkibədə TMMR elan bıkon. Respublika Parlamentikuən xahiş kardışone ki, Məclisi ım ğərari təsdiğ bıko.
Isət həmonə tarixi hadisəku 24 sor dəvardə. Tolışə millət ım ruji har sor de hurməti bə yod dənodə, ey bənə idi ğeyd kardedə.
Imsorən avğusti 6-ədə Moskva "Tolışə diaspora" təşkilati fəalon TMMR 24 -minə sorəqardış ğeyd kardışone. Çəvon ım tədbirədə çe osetinon, kurdon, ezbəqon, ermənion, tataron, ruson ictimai təşkilati numayəndon iştirak bəşone. Rusiya Xarici Koon Vəzarəti Diplomərik Akademiya dosent Yevqeniy Biryukovi de xususi məruzə votemon kardəşe. İsmayıl Şabanovi, Zabil Mədoji, Murvət Qurbanovi, Fərğiyyə Kərimova, Mərdan Quliyevi tolışə milli intibahi prespektiv və problemon barədə votemonon kardəşone. Məclisi iştirakəkon de bəyannamə bə Rusiya ali devlətə orqanon, İMT və Avropa İttifaği muraciət kardəşone. Tədbiri orəxədə ironıjon "Mehrəbonon" və ruson "Sudaruşka" ansamblon konsert doəşone.
Yekaterinburği Tolışə Milliə-Mədəniə muxtariyyəti, Azərbaycani Respublika Tolışə Mədəniyyət Mərkəzi lankoni şebə fəalonən de ım sorəqardışi munasibəti ıştə yubiley tədbiron dəvuniəşone.
