"Tolışon sədo" rujnomə 100-minə numrə

Oktyabrə manqi 31-minə ruji "Tolışon sədo" rujnomə 100-minə yubileyə numrə çe çapo beşe. İm rujnomə çe muasirə devri tolışə mustəğilə jurnalistika barzə zirvon fəth kardəşe.

Çey sər redaktor nəinki tolışə zıvoni, həmən azər-tırkə zıvoni pərqarə jurnalistonədey. Əv hələ 2011-minə sori iyunə manqi 26-ədə ım rujnomə 1-minə numrə bə əhandon təğdim kardeədə çey jurnalistə talant və tolışə zıvonə məharət ıştəni barzə səviyyədə nişon dodəbe. Sər redaktor Rafiğ Cəlilov ım 100-minə numrədə bə rujnomə 6 sornə fəaliyyəti nəzər səğandedə, bə rujnomə muracətən nıvıştedə ki, bı kutohə devrədə 100 numrə beşeş, çanədə de tı mubarizə bıbonən jiyəyş, hiçki tono qıybəkul nımandiş, anədə mışğıli dılədə be-be, boştı tam jəy ro bətı doə vədon ğəbul nıkarde, milləti dardi nişon doyku nıtarsiş, hejo həxə ro qəte, millətı bə hiç çi nəhvate, çiki ehtiyocış be - əvı mudafiə karde, ki ıştə royku dərəme – bəy çəy vırə nişon doe. Tı qıləy tarixiş! Omə nəslon tarixi tədğiğ kardeədə ““Tolışon Sədo”  rujnomə" tarixi co bənıvışten, çumçiko ıştı bımi həxı rəsedə. Tı həğiğətənən çı həmmə tolışon sədo be zınəyş. De həmmə tolışon zuy bə  səpo mandiş, tolışonən ıştı mışğılə vaxtədə tıni məydonədə cali onıqətşone, tı de TOLIŞON i coniş, çumçiko tı çəvon SƏDOş.

"Tolışon sədo" rujnomə maddi çətinəti səbəbiku ım sor cəmi 7 numrə bə əhandon edaştə bıə. 4 manq be ki, dərc bedənıbe. Nəhayət de Rafiğ Cəlilovi şəxsi təklifi, de Tolışi Sipirişon Şura təşəbbusi və çe Rusiya və Tolışıstoni ğıryətmandə fərzəndon koməqəti çe tolışə milləti ım mustəğilə azad mətbuati ıştə fəaliyyət dəvom kardışe, sənibəton bə tolışon azad tribuna peqarde, bənə çey sədo bə dınyo rosniə rupori vanq bekardışe.