İMT:Toliboni siyosət çe Əfğanıstoni jenon və ixtisodiyyoti vəomə təhdid kardedə

İMT Sər Katibi Əfğanıstoni sahədə Xususi Numoyəndə çe Toliboni hukuməti bə jenon zidd dəvom kardə məhdudəkə siyosəti de şiddəti tənğıd kardə holədə,kinə məktəbon bastey və çımi nəticədə bə əməl omə ixtisodi və sosyal nəticəon bo Əfğanıstoni sabitətiro ciddiyə təhlukə icod kardey barədə xəbərdorətiş kardə.

İMT Əfğanıstoni sahədə Xususi Numoyəndə Roza Otunbayeva oxonə se sor nimi ərzədə şəşminə sinfiku bəpe bə kinə məktəbon bastey məsələ işorə kardə holədə votəşe:“Im ğəror iqlə nəslış de məhfəti riski dimbədimış kardə və bo Əfğanıstoniro dırozmıddətin və boho bəsə omə nəticəon bəvarde”.Otunbayeva çı əfğanon əksəriyyəti bə kinon təhsili ələyh ğədəğə noey zidd bey və çın siyosəti bə kişfəri ixtisodiyyoti 1,4 milyard dollar ziyon jeyış təkid kardə.

İMT Sər Katibi Əfğanıstoni sahədə Xususi Numoyəndə əlovəş kardə:2021-ə soriku jıqoşə Beynəlxalğə İştimoiyyəti bə Əfğanıstoni təxminən 13 milyard dollar koməqış kardə,lakin bə ın dastəqi rəğmən,bə jenon və kamiyon zidd tətbiğ kardə bıə məhdudiyyəton dəvom kardedə və bə Toliboni hukuməti zidd iştimoyi norozəti ziyod bıə.

Pars Tudey bə İRNA istinodən doə məlumoti əsos,Otunbayeva bə Əfğanıstoni ixtisodi vəzyətiş həm işorə kardə və votəşe:2,7 fayizə ozavziye çe əhali ruşdi tempiku saruye və əhali 75 fayiz çı jimoni məyişəti minimum səviyyədə jiyedən.Hışkəsorəti,ovi behron və hamsuyə kişfəronku omə dəvitəyon kutləvi şikilədə bə dumo oqardey təzyiğ həm vəzyətış həni həm kritikış kardə.

İMT Sər Katibi Əfğanıstoni sahədə Xususi Numoyəndə bə xaşxaşi perosney noə bıə ğədəğənəti icro nıbeyış bə zıvon vardə ki,ın ğədəğənəti dırozmıddətinə perspektivədə foydənin həm bıbu,kırtə mıddətədə çe veyə beçizə fermeron həyotış məhf kardə və çe ğeyri-ğanuni kaşt-devi riskış vey kardə.

Otunbayeva çe Toliboni hukuməti siyosəti dəvom kardey,beynəlxalğə koməqon bəkam bey və sosyal təzyiğon çe Əfğanıstoni ayəndə həni həm toyki kardey barədə çəşnavi doə holədə,mıvəğğəti hukuməti bə məhdudiyyəton ne,bə təhsili,məşğuliyyəti və bə iştimoyi xıdməton çok kardey dığğət kardeyış təkid kardə.