Şotlandiyavıjə Vəkil:Jenə Şikorçiyon İnqilistonədə Ozodətiyədə Nəvedən

Nuyə təhğiğoton nışon doydə ki,İnqiltərədə bıə kinon iyən jenon hələm həm iştimoyi vıronədə ıştəni betəhlukə hiss kardedənin.

Sara Everard 2021-ə sori martə manqədə Londoni polis Ueyn Kazinsi tərəfiku bə təcavuzi məruz mandə və kıştə bıə.Im,çe Britaniya iştimoiyyəti ğəzəbin kardə və bə hevujə etırozon səbəb bıə qıləy dəhşətinə ğətle.Bə Pars Tudey doə məlumoti əsos,İnqilistonədə de Sara Everardi ğətli anqıl bardə bıə təhğiğoton nışon doydə ki,çəy ğətliku ço sor bədiqə jenon iyən kinon hələm həm ıştəni çın kişfəri kuçəonədə əmniyyəti dılədə hiss kardedənin.Şotlandiyavıjə məşhurə vəkil,çe Sara Ğətli Təhğiğoti rəhbər Elish Anciolini dəvardə haftə xəbərdorətiş kardəbe ki,Yolə Britaniyadə jenə şikorçiyon hələm həm ozodə formədə nəvedən və kişfrərədə bıə kinon iyən jenon çe Sara ğətliku ço sor bədiqə iştimoyi vıronədə çe hucumonku tarsi dılədə jimon kardedən.

Hisobotədə 2021-ə sori hodisəku jıqoşə behisobə jenon çe merdon tərəfiku bə hədəf sey bəyon kardey bıə və hucumon həxədə navnə məlumoton bə ğeyd seyədə və bə kinon iyən jenon hucumon navi qəteyədə bə"fundamentalə beovandəti" təkidış kardə.

Anciolini hisobotədə iştimoyi vıronədə bə jenon zidd cinsi motivinə cinoyəton barədə dəğiğə statistika nıbey və bo jenon təmniyyətiro siyosət və plan kəşeyədə norohətəkə qıləy fəzo icodətiş bəyon kardə.

Hisobotədə bəyon kardey bıə ki,Yolə Britaniyadə jenon dıjdə hissə,ə cumlə həm tələbəon, koəvonon,polisə jenon və s.,bın kişfrədə fəzo iyən iştimoyi vıronədə ziyod bıə əmniyyəti səbəbiku dayima hozzıə vəzyətədən;kuçəonədə jenon əmniyyəti darıştə hodisəon təkror bey bədiqə veyə britaniyavıjə jen kuçə təcavuzi tosə qılə həddi normal hisob kardedə və əvon vey qonə holon barədə məlumot doydən.

Hisoboton iqlə hissədə,Yolə Britaniyadə həzosə ziyodə jenon miyono bardə bıə İMT parsemoni istinod kardə Anciolini,çın jenon təxminən 71%-i ıştə həyotonədə minimum i dəfə iştimoyi vıronədə de har qıləy cinsi təcavuzi və ya hoziyəti dimbədim omeyış bəyon kardə.

Çın hisoboti iqlə hissə həmçinin çı Britaniya polisə məmuron təcavuz və cinsi hoziyəti məhkumi təkrorə nımunə istinod kardedən və ın holon besəmərəti səbəbiku bə jenon ələyh hoziyətiro muhit icod kardə bənə qıləy ğusurinə strukturədə analoji cinoyəton təkror bey riski əloməton ğəbul kardedə.

Bın miyono,Britaniya Parlamentədə bıə çanqə qılə jenə milləti vəkilon de merdon hoziyə hucumon dimbədim omə təğdırədə de hostonəti viteyro kəyku beşə zəmonədə ıştə idmoni məşoon bəştə tan kardey və kəy kənoədə coyli bıə zəmonədə bo ıştəni çe əmniyyəti dılədə hiss kardero hejo deştə duston de telefoni qəp jeyışon bəyon kardə.

Sosyal eksperton jıqo hisob kardedən ki,Yolə Britaniya polis və məhkəmə strukturon bə jenon ələyh cinoyəton navi qəteyədə və de əvon muborizədə ciddi və xroniki zəyifətiyonku əziyyət kəşeydən.