Suriyə Hərəsta məntəğədə bə silohinə ğıvvon mınosibə zumandə cəvob doe bəbe.
Suriyə paytəxti şərğ məntəğəonku qıləyni Hərəsta məntəğədə silohinə qrupon həmləon dəvom peydo karde bəpeştə Suriyə milli dustiyəti vəzir bə ım silohinə ğıvvon mınosibə zumandə cəvob və reaksiyaku xəbəş do.
Bə Mehr aqentiyəti raporti əsos Əli Heydər təkidış kardə ki Hərəsta məntəğədə silohinə ğıvvon sulh tələb nin ijən əlovəş kardə: çand kərə ım məntəğədə otəş basti arşiye bəpeştə ısət Suriyə hərbion mınosib və zumandə reaksiyaon yəğin bino bəbe boçi ki ım məntəğədə daimən terroriston bə dıvlətiyə iyən ğeyri hərbion huccum kardən.
Suriyə hərbion zinə de mığovimət ğıvon koməki Hərəsta məntəğə hərbi nəğliyat idarə mıhosirə karde əməliyati məğlub ijən Əlmotaden məntəğə ozod kardən.
Çımiku bə nav Suriyə dıvlətiyə televeziya Hərəsta məntəğədə hərbiyə bazaon mıhosirə arşiye barədə çı Ərtış ğıvvon muvəffəğiyətonku xəbə doəş be.
Isət Suriyədə DAEŞ-i kamilən məğlub karde bəpeştə çande bə Ərəbiston və Amerkə vabəstə bıə terroriston Suriyədə fəaliyət kardən ki veyni Edleb və Həma ostanonədən.
Suriyə hərbion və Suriyə dustə kişvəron hədəf ısət ım kişvərədə bənə Əlnosrə və ozod silohinə nimə hərbi terroristiyə qrupon məhv karde ğeyd bıə.
