Suriyədə terroriston cinoyətonədə xarıci rəsmi şəxson iyən siyonist rejimi rol.

Suriyə xarıci vəzarətxanə bə i bıə milləton təşkilati sədr iyən ım təşkilati Əmniyyət Şura co bə co məktobon vığande çərçivədə Dəməşği ətrofədə çı terroriston tojə cinoyəton və beqınohə milləti ğətliamədə bəzi ğərbi rəsmi şəxson həmkari və mıdoxiləon barədə etırozış kardə.

Bə İrna raporti əsos Suriyə xarıci vəzarətxanə ım 2 qılə təşkilati rəisonku tələbış kardə ki həminə cinoyəton məhkum bıkon.

Məktobədə təsdiğ bıə ki ğərb hejo bə Suriyə ıştə şəhrvandonku mudafiə karde həxi ijən de terrorizm mubarizə barde inkor kardən.

Suriyə xarıciyə vəzarətxanə ijən əlovəş kardə ki zinə ruj Şərği Ğutə məntəğədə silohinə terrorçiyon Dəməşği ətrofədə çı şəhrvandon kəon iyən çandə xiyobonon, noxşxonəon, məktəbxonəon və umumi vırəon deştə rəkıtiyə huccumi vironə kardən ki çandə cəmaəti kışte bois bıə.

Bə Suriyə xarıci vəzarətxanə ım raporti əsos, fakton nışo dodə ki vey xarıci rəsmi şəxson iyən bəzi ğərbi kişvəron sə rost ya ğeyri mıstəğim həminə cinoyətonədə rolışon heste və ım cinoyətədə de terroriston həm dastin.

Tojədən çı siyonist rejimi mıdoxiləon barədə həm xəbə omə ki ım rejim de şiddəti bə Suriyədə bıə silohinə qrupon və terroriston komək karde holədəy ta əvon oxonə məğlubiyətiku nicot peydo bıkon.

Isət 7 sor Suriyədə canqi bəpeştə terrorist bəştə vey zəifə mərhələ rəsəşone ijən Suriyə milləti oxonə səbarzəti vey nezə bıə.