Bə Suriyə ərtışi bazəon bıə tojə rəketiyə həmləon .

Suriyə ğərb və şimal, Hələb iyən Həmah ostanonədə bıə bəzi çı Suriyə ərtışi hərbi bazəon zinə şəv de çand qılə rəketiyə həmləon dimbədim bıən.

Bə Ruyterz raporti əsos, Suriyə dıvləti televeziya ım kişvəri ərtışi nəğliku elan kardə ki Suriyə ğərb və şimal, Hələb iyən Həmah ostanonədə bə ım kişvəri bəzi hərbi bazəon rəketiyə həmləon, Suriyə deşmənon tərəfiku tojə təcavuz heste.

Suriyədə məhəlliyə mənbəon həm raportışon doə ki bə Həmah cənubədə bıə Zarəh hərorəti elektrostanciyə çand qılə rəketi qınye nəticəku ım mərkəzi bəzi baxşon fəaliyətədə tikəy poroblem ıcod bıə.

Skay Niyuzi televeziya kanal həm elanış kardə, raporton jıqo təsdiğ kardə ki zinə şəvi bə Suriyə Hələb və Həmah məntəğon həmlə karde cərəyonədə ijən bə İsrail ərtışi planon bənəzə omeydə.

Bə ım raporti əsos ım təcavuzi nəticəku 40 nəfər kışte və 60 nəfər zəxmin bıən.

Aprili 14 ədə ijən Amerkə, Fransə və Beritaniya de ım bəhonə ki Suriyə Duma şəhrədə bıə şərği Ğutədə kimyəbi silohonku istifodə bıə, 100 qıləku vey rəketon bə Suriyə mərkəz və Dəməşği ətrofədə bıə bəzi hərbi bazaon tərəf ğandən.