Yəməni xarıci vəzir: çəmə raketon bo mıdofiə istifodə bıdə.

Yəməni mıvəğğət dıvləti xarıci vəzir de təkid bə ım ki Yəməni kişvəri raketon bo mıdofiəy işorəş karde: aqə bə Yəmən Ərəbiston həmlə və təcavoz oqətey bıbu, Yəmən hozzoe ki bə Ərəbiston raketi həmləonku dast bıkəşi.

Heşam Şərəf de Əlməsirə kanali misohibə ijən təkidış karde Yəməniku bə Ərəbiston raket ğande barədə Amerkə xarıci vəzarətxanə oxonə bəyoniyə hıç əhəmmiyətış ni.

Amerkə xarıci vəzarətxanə dışəmbə qıləy bəyoniy vositə bə Səudiyə Ərəbistoni paytəxti tərəf Yəməni ərtışi tojə hərəkət iyən çand qılə raket ğande, məhkumış kardə.

Amerkə vəzarətxanə ijən iddioş kardə ki yəməni ərtış de İroni himoyə və koməki ım raketon ğandedə.

Yəməni dovtələb komitəon və ərtış bə Səudiyə rejim və çəy mıttəhıdun dəheştinə cinoyət və təcavozon reaksiya nışo doero bə Riyozədə bıə Ərəbıstoni mudafiə vəzarətxanə informasiyə mərkəz və çand qılə vabəstə bıə hərbi iyən podşo ğərorqohon raketiyə həmlə kardeşone.

Ərəbiston de İ Bıə Ərəbon Əmirəti, Amerkə və çand qılə co kişvəron himoyə 2015-nə sori Martiku hərbi təcavoz bə Yəmən bino və ım kişvəri həvo, dıyo iyən zəminiku mıhosirəş karde.

Yəmənədə Ərəbiston və çəy mıttəhidon canq ta ım zəmoni bə 14 həzo nəfər nezi Yəmənıjon kıştə və çand milyonon nəfəri avarəti bois be.

Səudiyə təcavuzkorə koalisiya iddion kardedə ki İron siloh və raketon bə Yəməni dodə və əmələn Yəməni bıhrani həl karde mane bıdə.

Yəməni rəsmi şəxson əmmo çand kərə təkid kardən çəvon ərtışi mudafiə ğudrət kamelən bumiye və qıle holədə ki Yəmən həmmə tərəfinə mıhosirə şərayetədəy əmmo ijən har ruji ım sahədə ğudrəti zumand karde holədəy.