İrağ: bə İroni zidd Amerkə iddion beəsose.

İraği xarıci vəzarətxonə sıxənəvot, bə İroni əleyh bəyon bıə ittihamon Bəsrədə bə Amerkə konsuləti həmlə karde barədə rəddış kardə.

Vaşenqtonədə İraği xarıci vəzarətxonə sıxənəvot, Əhməd Əlməhcub, zinə votışe: bə İroni əleyh bəyon bıə ittihamon İraği Bəsrədə bə Amerkə konsuləti rəketiyə həmlə barədə, qıləy səhvə sıxane.

Əhməd Əlməhcub ijən Bəsrədə bə İroni konsuləti həmlə karde məhkumış kardə və votışe: Bəsrədə etırozəkəon bə İroni konsuləti həmlə karde barədə  ıştə təəsufi izhor kardəm.

İraği xarıci vəzarətxonə sıxənəvot eyni holədə təsdığış kardə: Bəsrəədə iyən tojə binaədə İroni konsuləti fəaliyəti dəvomiku xoşholimon.

Amerkə xarıci vəzarətxonə de ım iddio ki Bəsrədə ım kişvəri konsuləti həmləkə amilon bə İron vabəstən, ım vəzarətxonə tojə ğərol İraği Bəsrə şəhrədə Amerkə konsuləti dəbasteyku xəbə doə.

İroni xarıci vəzarətxonə sıxənəvot Bəhram Ğasımi de Bəsrədə bıə bə İroni konsuləti tojə həmlə bəyod varde votışe: Amerkə rəsmi şəxson hırdənə təfsiron bo İrağədə avanturizm və noəmni icod kardey iyən bə ım kişvəri dıvlət fişar varde, çok məlume iyən muşahidə bıdə.

2018-nə sori Septiyabrə manqi 7, i dastə etırozəkəon ki vote bıdə bə İraği şahrvandon xidmət karde vəziyətiku məvuji norohət bin, Bəsrədə bə İroni konsuləti təcavuzışon karde və konsuləti bina otəşışon jə.