De Xanım Həzrəte Fatimə Zəhra(s) şəhodətə ruji mınosibəti səbəsəloməti.
Imruj Hicri Ğəməri Cəmadiul Əl-Sani manqi 3 iyən Yanvari 6-nə ruje, bə təğvimi əsos, ımruj de Xıdo Rəsul(s) qiramiyə kinə və dınyo şiəyon 1-nə İmom Həzrəte Əli(ə) qiramiyə həyot həmro şəhodəti sorqərdışi bərobəre.
Həzrəte Fatimə Zəhra(s) Beesəti 5-nə sor Cəmadius-Sani 20 ədə Məkkəədə bədınyo omə.
Ə Həzrət Hırdənəti faxtiku ıştə qiramiyə dədə Həzrəte Muhəmməd(s) hidoyəton jentonədə de İlahi məarif oşno be, ijən ıştən çı Xıdo dərqah məxsusə bandəon və İlahi elmon sərçəşmə be.
Həzrəte Fatimə Zəhra(s) jimoni həmmə ləzəonədə isor, səbr, qızəşt, qinoət, səxavət, Xıdo ibadət iyən bə fəğıron komək kardeyku aliyə nımonəon moşahidə kardənine, ijən vey yolə tarix əsoxtə şəxsiyətoni bənə İmom Həsən(ə) iyən İmom Huseyn(ə)-i tərbiyəş karde.
Oxo ə Həzrət 18 sor jimoni bəpeşt çandə bə zəmonə hakimon zılm və sitəm iyən ıştə qiramiyə dədə Muhəmməde Mıstəfo(s) bəfoti dard-ğəmi xoto de bəzi rəvayəton bərobər Hicri Ğəməri 11-nə sori Cəmadiul Əvvələ manqi 13 iyən bə co rəvayəton əsos Cəmadius Sani 3 ədə şəhid be.
De Həminə matəmə əyyami mınosibəti çı Əhli-beyt(ə)-i aşiğon zinə şəviku və de diğğət bə Korona protokolon rioyəti Məşhədədə bıə şiəyon 8-nə İmom Həzrəte Rıza(ə) iyən Ğomədə bıə Xanım Məsumə(s) pokə hərəmon iyən co vırəonədə bıə məçidon Huseyniyəonədə əzodorəti mərasimon bino kardəşone.
İroni Rəşt şəhri Tolışi Rədio tərəfiku çı Xanım Həzrəte Fatimə Zəhra(s) şəhodəti sorqardışi bəşımə səbəsəloməti və təsliyət ərz kardədəmon.
