sionist rejimi bə Fələstini muğəddəsə vırəonədə təcavuzi dəvom.

İroni xarıci vəzorətxonə sıxanəvot mıburək Rəməzonə manqədə bə mığəddəsə vırəon, nımoj votəkəson iyən rujə əqəton bıə sionist rejimi hucumi məhkumış karde.

Bə İrib raporti əsos, İroni xarıci vəzorətxonə sıxanəvot Səid Xətibzodə Ğuds iyən Fələstinədə bıə sionist rejimi vəhşi və terroristə rəftoron barədə votışe: bə Fələstini məzlumə milləti zidd sionist rejimi cinoyəton dəvom ın işğalçiyə rejimi zəifəti nışonəy ki ıştə məğlubiyəti puşniyeyro bə bedifoə nımujvotəkəson zidd benəticə əməliyoton nımoyeş doydə.

Xətibzodə əlovəş karde: sionist rejimi cinoyəton ki bəşər həxon poymol karde mənodəy har zəmoniku vey nışo doydə ki de ın rejimi əloğəon adi və normal kardey bə çəy rəftori insoni bey bois nibəbe, boçi ki ın rejimi zotədə behron icod karde iyən xun ru karde muşahidə bıdə.

Əv əlovəş karde: sionist rejimi cinoyəton bə şəy xoto dəvom kardeydə ki islami iyən ərəbi kişvəron bə Fələstini simvol iyən hədəfi peşt kardəşone.

İroni xarıci vəzorətxonə sıxanəvot  çı beynəlxalğ təşkilaton iyən dıvləton xususi mısılmonə millətonış dəvət karde ki Fələstini millətiku himoyədorəti kardeyro iyən Fələstinədə sionist rejimi cinoyəti vəy qətey çərçivədə ciddi reaksiya nışo bıdən.

Səid Xətibzodə, Ğudsədə sionist rejimi jığonə cinoyəton nəticə məsuliyəti bə ın rejimi qi zınəş be iyən bə Məçidul-Əğsaku himoyədorəti karde xoto islami həmkarəti təşkiloti rə tədbiron nəzərdəqəte tələb kardışe.

De Rəməzonə manqi dəme həmzəman Fələstini saheli şəhron əcumlə Ceninədə sionist rejimi cinoyəton şiddət ziyod bıə, anədə ki tosə bə ısət çandə Fələstinıj çın cinoyətkorə rejimi həmləonədə şəhid bıən.