Həzrəte Əli(ə)-i həxədə.

Rəməzonə manqi 21, Həzrəte Əli(ə)-i şəhodətə ruj bəşımə təsliyət ərz kardəm.

Bə Xıdo ğəssəm hidoyəti sutunon darşiye,təğva nışonəon məhf be və çı xalıği de məxloği miyono bıə dastək və dast qətə vırə pessiye.Mustafa(s)-I amuyəzo kıştey bev,Əliyyi-Murtəza(ə) bə şəhodət rəse və çı bədbəxton bədbəxt əvış şəhid karde.ım ğeybiku nido doəkəsi sədoye ki,Kufədə pevolo be və bə dınyo qıləy dıjdə bəlo xəbəş doe.xəbəş doe ki,insoniyyəti dınyo yətim be və ki,Odəm(ə)-i ğədr nızınə fərzəndon Xıdovəndi boçəvon nicotiro vıjniyə həmməysə ğoymə hidoyəti sutunon rıjiye və çəy bədiqə çı bəşəriyyəti torıxi saat və ləzəon çın zəmini kurəsə ğeyrəti bu pebəqəte və toyki bəbe.

Dı ruje ki,Əli(ə)-i zərbə vində bədəm yoquyədəy və Kufə şəhr qıləy həyəconinə vəzyətədəy.həmonə Kufə ki,çanə kərə bə Əli(ə)-i əziyyətış doəbe .tosə əvrə ki,çı dınyo həmməysə vey nehribon bıə movla və əğə,ıştə dastonış bə osmoni səmt rostış karde və voteşe:Xıdolim ha!bomı əkəson bıroson ki, çımonsə vey çok bıbon və boıvon ikəsi bıroson ki,çımısə vey bevəc bıbu.bəle,həmonə məxloğ ki,kamə hımmət və ğeyrət nışon doşone,zəmin iyən zəmonışon bə mutəğiyon movla tanq kardeşone. əmmo, ısət norohət və sərqərdon mandəbin ki,be Əli(ə),beçəy məhəbbəton,beçəy şucoəti,beçəy ədoləti, beçəy zumandə irodə və bıryiyə şımşi,beçəy nuroni vuccudi,bəçəvon omə jimon iyən larzə imonisə çiç bome?...

Co tərəfiku həm Əmirəl-Muminin(ə)-i dust və əshobon ,həmonə kəson ki,deşştə şımşiyon ıştə mevla xıdmətədə bin və bəçəy əmron pemandedəbin və de bəmə holəti ıştə mevla və əğə kəyədə cəm bıəbin.həmonə merd və jenon ki,çı viro bekardəşon nıbe ki,Ğədiri-Xumi ruji peyğombər(s) deştə mələkutiyə sədo çı həmməkəsiku bo mevla Əli(ə)-i beyətış sıəbe və hamyeşe:”hakəs ki,mı çəy mevlam, ın Əli həm çəy mevlay”.Mevla Əli(ə)-i duston norohətçəti de Kufə umumməxloği niqəronəti qıləy kulliyə farğış hestebe.əvon çı mısılmınon camiyə holiku norohətbin,peyğombər(s)-i mirosi norohətçəti və çə dıjdə mədəniyyətiku norohət bin ki,oxonə peyğombər(s) əvış bə ərsə vardəşbe və peyğombəri(s) umməti nodonəti və nohimməti çəy sutunonış rıjniyəşbe,voloş kardəbe. çı insoni torıxiku norohət bin ki,be Əli(ə) bəçəvon sə çiç bome?...

Əli(ə)-i kədə cəm bıə mıztərib iyən norohətə milləti miyono,ihissə həm hestebe ki,həmməysə vey ıştə mevla behəddo-marzə məhəbbətışon çaştə be və əvon çı Kufə yətim iyən fəğıron bin.Kufə yətimon bəme-şivən və pərişonə sıfəton,Əli(ə)-i dərvozə peştono bın dıqlə ruji odəmi dıli dojnə həmməysə ğəmqinə səhnə be.ə hırdənon ki,çəvon qırd be-nıbe i kasə şıt be ki,bo yətimon dədə tehfə vardəşonbe ta umuşon hestebe ki,deçımi vositə Mevla əzob kəşə bədənədə qıləy tojə con icod bıbu.əmmo əfsus!!...

Bın dıqlə ruji ki,Mevla bə yonqu eqıniyəbe,bəçəy kə kəno cəm bıə norohətə millləti mıloğat və vindemoni icozəşon doe.əvon iqlə-iqlə səlom doydəbin və həzrət deştə həmonə zəyifə coni ki,zəhri təsir çəy qırd vucudədə hətto çə həzrəti lınqonədə həm oşkobe,bə milləti xitobən hamyeşone:”səluni ğəblə ən təfğiduni,lakin xəffifu ələyyə”-mıni çı dasto doey bənav,mıku dəparsənən,çımıku tələbkənən.lakin de kırtə sıvoli”.Əli(ə) çı huşiku şıey iyən bə huş omey miyono iləzə həm,çı umməti hidoyəti koyku dast kəşeydənıbe və dılış hestebe millət çəy elm iyən zıney dıyoku qıləy bəhrə bıbon...

Umum milləti mıloğatiku əlovə ki,bın dıqlə ruji bə əməl ome və bəvonədə bə İmom(ə) jholi bevəcəti iyən cəmyəti ziyodəti dəlili xoto,hiç qıləy sıvol-cəvobi bəhs nıbe və çə həzrəti məxsusə əshob mıvəffəğ bin ki,mevla umri oxonə ləzonədə bəçəy huzuri bırəson.çəvonku qıləyni həm Həbib ibn Əmr be.əv nəğl kardedə ki,bə mənzil varid bim və vindeme ki,çə həzrəti kinonku qıləyni bəmedəbe və ıştə çəşi arson rukardedəbe.az həm bəmedəbim və kəy kəno bıə millət həm kədə omə bəme sədo məseyədə əvon həm bəmedəbin.Əmirəl-Muminin(ə) ıştə çəşış oj karde və hamyeşone:”ehanə çımi vində çiyon,şımə həm vindəyonbe,həni şımə nıəbəmiyon”.ərzım karde ya Əmirələmuminin,bəqəm şımə çiç vindedə yonki? hamyeşe:”mı Xıdo məlayikon vindedəm, osmoni firiştəon vindedəm.qırd ənbiya və mursəlon vindedəmki, səfışon kəşə və bəmı səlom doydən və xəşomə votedən. peyğombəri vindedəm ki, çımı palu nıştə və votedə ha Əliha!rəyrə boy.qıləy dınyo tıni çəş kardedə ki, botı vey çoke bəsə ıştı bıə ısətnə dınyosə”.

 Çoko ki,təbibi Əmirəl-Muminin(ə)-i mıolicə kardeykoyədə ıştə ocizətiş elon karde,həzrət Əli(ə) İmom Həsənış(ə) bəştə səmt vanqış karde və binoş karde deəy bə sehbəti.ə həzrət ıştə vəsiyyəti ibaxşonədə hamyeşone:”şıməni bə təğva iyən Xıdoku tarsi sıfarış kardedəm və dınyotələb məbənən,harçənd dınyo şıməni tələbko və (dınyo dərostəyonku)bə şımə dasto şıə çiyon  xoto ğussə məhənən və rost iyən həxə sıxani bıvotənən və bo(axırəti)mıkofotiro kokənən.de sıtəmkoron deşmın bıbənən və de məzlumon dust”.

Əli(ə) ıştə vəsiyyəti co baxşonədə hamyeşone: Xıdoku!Xıdoku!(bıtarsənən).çı yətimon həxədə.məbodə əvon vəşyan və bexıvand bımandon. Xıdoku!Xıdoku!(bıtarsənən).ıştə hamsuyəon həxədə.