İroni Yolə Rəhbər: sioniston çı islam dınyo təcili bəloin.

İroni Yolə Rəhbər sionistonış çı islam dınyo təcili və nəğdə bəlo zınəş be və təsdiğış karde: sionist rejim həmonə dıvləton ki dəy əloğəon normal kardən istemor kardeydə.

Bə İroni Yolə Rəhbəri məlumat ərosnə sayti raporti əsos, Həzrət Ayətullah Xamenei ımruj de ımsornə sori həcci koəkəyon vindemoni cərəyonədə əlovəş karde: çı sioniston plan və xəbisə koon ifşo kardey həccədə bənə lozimə koy bəpe əncom bıbu iyən həmonə ərəbi və ğeyri ərəbi dıvləton ki ıştə milləton tələbi əks iyən Amerkə rizoyəti cəlb kardeyro, bə sionist rejimi həmkarətion normal karde səmti şin aqah bıbun ki ın əşt-nışt ğərəz sionist rejimi tərəfo çəvon istemori co nəticəş nibəbe.

İroni Yolə Rəhbər, həcci çı islomi  umməti vəhdət və i bemoni simvol bə hisobış varde iyən təsdiğış karde: bəpe həmmə səy-cəhdon əncom bıbu ta bə mısəlmonon vəhdəti zərbə varid nıbu, boçi ki ixtilofi icod karde xususi şiə və sınnion miyono ixtilof çı İnqiltərə şivə iyən koonin.

Həzrət Ayətullah Xamenei de co kişvəron zairon çok iyən bəsirətinə rabitəon və Kərimə Ğıron iyən çokə ğarionku istifodə kardey həminə ibemoni əlovə kardey zəminəonin.

İroni Yolə Rəhbər bə mizbonə dıvləti qiədə bıə məsuliyəton iyən ın dıvləti bə islom dınyo xeyri əsos əməl kardə koon zərorəti işorəş karde və votışe: həmmə zairon xususi İroni zairon əmniyəti təmin karde iyən nakonə faciəon tikrori vəy qəte həmçenin xərconədə ijən diyə karde çı İroni nizomi ciddi tələbonin.

Həzrət Ayətullah Xamenei de yande bə ico jimon kardey təlim, sodə jimon, qınohonku diəro bey və pərhizkorəti çı həcci muhimmə dərsonku bə hisobış varde.