5 milyon İronıjə zair Ərbəin Huseyni(ə)-i şemonədə iştirok bəkan.

İroni sı ovşemə imdidodiyə təşkiloti həc və ziyorət səhiyyə mərkəzi rəis 5 milyon İronıjə zairi ımsornə sori Ərbəine Huseyni(ə)-i şemonədə iştirok kardeyku xəbəş do.

Hicri Ğəməri 1444 minnə sori səfə manqi 20, miladi 2022 minnə sori sentiyabri 17, Kərbəloədə şiəyon 3 minnə İmom Həzrət İmom Huseyn(ə) və çəy bəfodorə əshobi şəhodəti 40 minnə ruje, həminə rujədə çandə zairon İmom Huseyn(ə)-i pokə hərəmi ziyorət kardeyro bə İraği cənubədə bıə Kərbəlo şəhri varid bəben.

Co İlahi dinonku tərəfdaron iyən mısılmonon dəvardə soronədə, çand ruj bə Ərbəine Huseyni(ə)-i mandey de piyodə lınqi İraği Nəcəf və co şəhronku ıştəni bə Kərbəlo şəhri rosneydən.

İroni sı ovşemə imdidodiyə təşkiloti həc və ziyorət səhiyyə mərkəzi rəis Seyd Əli Mərəşi tojədən bə İrna aqentiyəti votışe: de diğğət bə tojə soronədə koronavirusi pandemik şərayeti iyən səfəri məhdudiyəton, bə nəzə omeydə ki ımsor de həminə məhdudiyəti peqəte 4 tosə 5 milyon zair Ərbəine Huseyni şemoni mərosimədə iştirok bəkan.

Mərəşi bə İronıjə zairon xidmət rosniyeyro sı ovşemə imdidodiyə təşkiloti həc və ziyorət səhiyyə mərkəzi məsuliyəton işarəş karde və təkidış be ki ın sahədə çı İroni universition və ğeyri dıvləti təşkilaton zərfiyətiku həm bə zairon xidmət rosniyeyro istifodə bəbe.

İroni sı ovşemə imdidodiyə təşkiloti həc və ziyorət səhiyyə mərkəzi rəis ijən votışe: roonədə bıə kilinikon iyən de İraği noxəşxonəon bıə həmkarion həm ziyod bəbe ta Ərbəini zaironro çokə şərayet hozzo bıbu.