Şələmçə beynəlxalğə marz Ərbəine Huseyni(ə) zaironro oj be

Xorrəmşəhri şəhrıstoni məxsusə fərmandor elanış karde: Şələmçə beynəlxalğə marz bə Ərbəine Huseyni(ə) zairon səfəriro oj be.

Muğtəda Sədr bəyoniyə ğolibədə, İrağədə bıə siyasi fəaliyətonku ıştə dast kəşey elanış karde və həminə bəyoniyə bəpeşt, çəy tərəfdaron Bəğdadi havzə məntəğədə bə prezidenti saray həmləşon kardə iyən çand saət bəpeşt, de Sədri peşmonçiyəti bəyoniyə çı Bəğdadi havzə məntəğəku xaric bin.

Həminə cərəyonədə 30 nəfər kıştə bıən.

İrağədə no oromətion icod bey dumoədə, Şələmçə iyən Çəzzabə marzi terminal dəbastə bıə be ki ımruj yəni çoşəmbə ruj sənibəton Ərbəine Huseyni(ə) zairon şe-omeyro oj bıə.

Bə İrib raporti əsos, İroni Xuzıston ostanədə Xorrəmşəhri şəhrıstoni məxsusə fərmandor Nadır Əmidzodə votışe: bə Ərbəine Huseyni(ə) mərkəziyə ğərorqoh elami əsos, Şələmçə beynəlxalğə marz Ərbəine Huseyni(ə) zairon səfəriro ijən oj bıə.

Əmidzodə əlovəş karde: zairon karde bəznen deştə eteborinə pasporti bə Şələmçə marz mırociət bıkon.

Həmçınin Xuzıstani ostandari polisi əmniyyəti muavin votışe: de diğğət bə İrağədə no oromətion sə bey, və bə kişvəri Ərbəin ğərorqoh elami əsos, İroni həmmə marzonədə əcumlə Şələmçə iyən Çəzzabə marzonədə, tojədən şe-omey əncom bəbe.

Xozıstani ostandari polisi əmniyyəti muavin ijən əlovəş karde: Şələmçə və Çəzzabə marzonədə və Ərbəine huseyni(ə) zairon şe-omeyro həmmə şəroyeton icod bıə və umidımon heste Həzrəte Əbaəbdullahel Huseyn(ə)-i zairon be hiç muşkil bə Kərbəlo muğəddəsə şəhr mışərrəf bıbun.