İrağədə 1800 qılə xidmət xeyməon mıəyyən kardey.

İroni vəzarətxonə Ərbəine Huseyni(ə) ğərorqoh katibəti İrağədə 1800 qılə xidmət xeyməon mıəyyən kardeyku xəbəş do.

Bə İrna raporti əsos, İroni kişvəri vəzarətxonə Ərbəine Huseyni(ə)ğərorqoh sərkatib Muhəmməd Təği Bağıri votışe: İraği ziyorətiyə şəhronədə əcumlə Nəcəf, Kərbəlo, Kazımeyn və Sameraədə bıə 1800 qıləku vey İronıjə xıdmət xeyməon mıəyyən bıən.

Bağıri bə Kərbəlo səmti İroni nəğliyoti vəziyəti barədə votışe: bə proqonozon əsos, 45 həzo 214 nəfər həvo, 1 milyono 307 həzo 896 nəfər həm zəmini bənə cadde iyən reyls xətton, həmçınin co zairon həm bənə dəvardə soron ıştə şəxsiyə maşinonku səfəriro istifodə kardedən.

Hicri Ğəməri 1444 minnə sori səfə manqi 20, miladi 2022 minnə sori sentiyabri 17, Kərbəloədə şiəyon 3 minnə İmom Həzrət İmom Huseyn(ə) və çəy bəfodorə əshobi şəhodəti 40 minnə ruje, həminə rujədə çand milyon zair İmom Huseyn(ə)-i pokə hərəmi ziyorət kardeyro bə İraği cənubədə bıə Kərbəlo şəhri səfər bəkan.

Dəvardə soronədə, mısılmonon və vo İlahi dinon tərəfdoronku kali, bə İmom Huseyn(ə)-i şəhodətə Ərbəini çand ruj mandə, de şemoni royku Nəcəf iyən İraği co şəhronku ıştəni bə Kərbəlo və İmom Huseyn(ə)-i pokə hərəm rosniyedən.