Ərbəine Huseyni(ə) mərosimədə Zairon əmniyyəti təmin kardeyro, İraği kişvər vəziri təkid

İraği daxıli vəzir təkidış karde: icozə nibədamon Ərbəine Huseyni(ə) mərosimədə hiç curnə problem iyən muzahimət icod bıbu.

Hicri Ğəməri 1444 minnə sori səfə manqi 20, miladi 2022 minnə sori sentiyabri 17, Kərbəloədə şiəyon 3 minnə İmom Həzrət İmom Huseyn(ə) və çəy bəfodorə əshobi şəhodəti 40 minnə ruje, həminə rujədə çand milyon zair İmom Huseyn(ə)-i pokə hərəmi ziyorət kardeyro bə İraği cənubədə bıə Kərbəlo şəhri səfər bəkan.

Dəvardə soronədə, mısılmonon və vo İlahi dinon tərəfdoronku kali, bə İmom Huseyn(ə)-i şəhodətə Ərbəini çand ruj mandə, de şemoni royku Nəcəf iyən İraği co şəhronku ıştəni bə Kərbəlo və İmom Huseyn(ə)-i pokə hərəm rosniyedən.

Bə İraği dıvləti rəsmiyə aqentiyəti raporti əsos,  zinə və Bəğdadədə Ərbəine Huseyni(ə) mərosimi həmohənqi iclosədə, İraği kişvəri vəzir elanış karde: de əmniyyəti tədbiron vositə, iyən de həmmə vəzarətxonə iyən rəsmi şəxson iştiroki, və bə İmom Huseyn(ə)-i Ərbəini ziyorəti mınosibəti xoto xıdmət rosniye planon həmohənqionro qıləy iclosi bərpo kardemone.

İraği kişvəri vəzir əlovəş karde: əmniyyəti planon icra beyro bəpe həmmə vəzarətxonəon səmtiku qırdə bıə cəhdon iyən himoyəon əncom bıbu, əcumlə Ruşnə, nəğliyot, nat və bələdiyəon vəzarətxonəon tərəfiku.

Əv bə İraği kişvər həmmə baxşonədə əncom bıə veyə cəhdon işorəş karde və votışe: de Ərbəine Huseyni(ə) mərosimi muxtəlifə baxşon fəaliyət iyən koon bino bey həmzəman, xıdmət ərosnə baxşon miyono həmohənqion çimiku vey oşko bəbe.

Həmçınin Şəmbə rujədə, İraği dıvləti rəsmi şəxsonku qıləyni, Heydər Məcid həm elanış kardə be ki dəvardə rujonədə, hamsuyə iyən dınyo co kişvəronku zairon varid bey vəziyəti kontrol kardeyro, marzi terminalonku çand minnə kərə vindemonon əncom bıə.

Məcid ijən təkidış karde ki bə İraği iminnə vəzir, Mustəfa Əlkazımi əmri əsos, marzi terminalonku himoyədorətiro həmmə dıvləti iyən xıdmət ərosnə imkanatonku istifodə bəbe.