Bəğdadədə bıə İroni səfir iyən İraği tojə prezidenti vindemon.

Bəğdadədə İroni səfir iyən İraği tojə prezident de yande vindemon və votımonışon kardə.

Bə Fars aqentiyəti raporti əsos, zinə Bəğdadədə bıə İroni səfir Muhəmməd Kazım Ale Sadığ iyən İraği tojə prezident Əbdullətif Rəşid de yande vindemon iyən muxtəlifə məsələon barədə votımonışon kardə.

Oktiyabrə manqi 13 minnə rujədə, yəni İraği parlamenti səçın bərpo beyku 1 soro 3 ruji bəpeşt, və de ım vucud ki Kordi vey muhimmə 2 qılə partiya miyono dırozə daveon əncum bıə, nəhayətədə parlemanədə ım kişvəri tojə prezidenti intixobi iclos bərpo bıə və sədə aşmardey bəpeşt, İraği parlamentədə Əbdullətif Rəşid muvəffəğ bıə 162 qılə sədo bəştə ixtiso bıdə və Bərhəm Saleh de 99 sədo ım riğabətonku xarıc bıbu.

Əbdullətif Rəşid təcili ıştə intixob bey bəpeşt, parlamenti vey yolə fraksiyoni namzəd Muhəmməd Şiyae Əlsodani iminnə vəziriro, İrağədə tojə kabineti icod bey məmor elanış kardə.

İron İslam Respublika prezident Sed İbrahim Rəyisi həm Əbdullətif Rəşidi vıjnioyə bənə İraği tojə prezidenti bəpeşt, de qıləy mesaji vığandey vositə, ım səçıni bə İraği millət və dıvlət təbrik votışe və umidış do ım kişvəri tojə dıvlət İraği bə inkişof rəsey və ozavziyə cəhəto qəm peqəto və dəvardəku vey Tehron və Bəğdad rabitəon hevuj iyən nığıl surətədə əlovə bıbu.