Ənnəxalə: mıstəğilə təşkilat, sionist rejimi əmniyyətiro qıləy əbzore.

Fələstini İslami Cihod hərəkəti sərkatib votışe: Baxtəri koridorədə mıstəğilə təşkilat, sionist rejimi əmniyyəti təmin kardeyro bə qıləy əbzor əvəz bıə.

Miladi 1993 minnə sorədə, Oslo təvafuği zəmoniku, mıstəğilə təşkilat iyən sionist rejimi miyono əmniyyəti həmohənqion bərğəror bıə və dəvardə soronədə, Fələstinıjon dastqirəti cərəyonədə, ım təşkilat de Məhmud Əbbas rəhbəriyəti vositə vey muhimmə rolış be.

Dəvardə manqədə, Nablus şəhrədə mıstəğilə təşkilati əmniyyəti hərbiçion, 2 nəfər Fələstinıjə mubarizəkə dastqirışon kardə. ım 2 nəfər nomon Musəb Aştiyə və Əmid Təbilə bin ki de sionist rejimi vositə təğibi jintonədə bin.

Bə Əlcəzirə televeziya kanali raporti əsos, zinə Fələstini islami cihod hərəkəti sərkatib Ziyad Ənnəxalə təkidış karde: de zəmonon dəvardey vositə, mıstəğilə təşkilat bə qıləy əmniyyəti təşkilat əvəz bıə ki bə israili əmniyyəti təmin kardey xıdmət kardedə və çəvonku məvacib həm qətedə.

Ənnəxalə ijən təsdiğış karde: israil de Baxtəri koridori əholi koəkəyonro bənə ambo rəftor kardedə iyən eyne holədə, əqə Fələstinıjon həmlə kon, hərbi ğıvvon bə həmonə vırə vığandedən, ta iğtişoş, ğətl iyən mısodirə hərəkəton əncom bıdən.

Çımiku bənav həm Fələstini İslami Cihodi hərəkəti ali uzv Muhəmməd Şələh mıstəğilə təşkilatiku tələbış kardə be ki Fələstini muğaviməti canqəkəyon kənoədə ğərorış qətə iyən bə şəhidon xun bəfodor bıbun.