Ayətullah Rəyisi: inkişof, ədolət iyən muğaviməti roy, de zumandəti dəvom bədamon.

İron İslam Respublika prezident bəyonış karde ki İron, inkişof, ədolət iyən muğaviməti roy, de zumandəti dəvom bədoy, ijən təsdiğış karde: İroni bestabil kardeyro deşmonon vey cəhdon nışoş do ki İron iyən məntəğədə çəvon hədəfi bə vırə rosniyeku numid və ğeyzinış kardə, ım xəbisə planon bois nibəbe, İroni yolə millət, bəştə hədəfi roy şək bıko.

Bə İrna raporti əsos, tojədən Ayətullah Sed İbrahim Rəyisi Suriyə xarıci vəzir Feysəl Miğdadi vindemonədə bə 2 qılə kişvəri təvafuğon komilə surətədə icra bey iyən çəy təğib kardey zərrurət təkidış karde iyən votışe: Suriyə de çand sornə bıhrani sə kardey, və ıştə deşmonon məğlub kardey, ısət qıləy vırədə ğərorış qətə ki de bə iğtisodi həmkoətion diğğət kardey vositə karde bəzne ıştə stratejikə rabitəon de İron bə tojə mərhələ varid bıko.

İroni prezident ijən bəyonış karde: həmonə kəson ki Suriyədə bıhron icodışon kardə, ısət cəhdışone ki bə İroni ələyh fitnə icod bıkon, əv ijən əlovəş karde: vaxti deşmonon muşahidəşon kardə ki hərbi dəqardımoni, icbor bıə canq iyən vey soron təhdid və terror iyən sanksiya karde zınəş nıbe ki İroni milləti inkişofin vədə mane bıbu, komil və oşko surətədə bə meydon omin və bə İroni milləti ələyh iğtişoşon icodışon kardə.

Im vindemonədə həmçınin Suriyə xarıci vəzir Feysəl Əlmeğdad Şirazi Şahçeraği pokə hərəmədə terroristiyə cinoyəti məhkumış kardə iyən votışe: İron və Suriyə stratejikə rabitəon de zumandəti bəştə roy dəvom bədoy.

Suriyə xarıci vəzir ijən votışe: oşkoe ki vaxti Suriyədə məntəğə milləton deşmonon məğlub bıən, be şək İroni zumandə milləti vədə karde zınəşon ni, ıştən hədəfon bə vırə bırosnon.

Əlmeğdad həmçınin de İron iğtisodi həmkoətion hevujəti baxşədə bəştə kişvəri meyl təkidış karde.