Rəyisi, de İraği tojə dıvləti həmkoətiədə bə əloğəon inkişofi təkidış karde
De İraği iminnə vəziri mıştərəkə xəbəiyə iclosədə İron İslom Respublika prezident umidvar be ki İraği tojə dıvlətədə 2 qılə kişvəri həmkoətion bə inkişof bırəsi.
Bə İran Peres aqentiyəti raporti əsos, zinə Tehronədə İron İslom Respublika prezident Sed İbrohim Rəyisi de İraği iminnə vəzir Muhəmməd Şəya Əlsudani mıştərəkə xəbə iclosədə votışe: məntəğədə sulh iyən stabileti, de terroristiyə təşkilaton iyən harcurnə noəmni ki məntəğə təhdid bıko mubarizə bardey çı 2 qılə kişvəron miyono bıə təvafuğonku bə hisob omeydə.
İron İslom Respublika prezident ijən əlovəş karde: xarıcion iştirok, bə məntəğə problemon coqılə problemi əlovə kardedə və məntəğəku ım hərbiçion xarıc bey, karde bəzne bə məntəğə əmniyyəti vey təsirış bınə.
Rəyisi ijən bəyonış karde: İron iyən İraği miyono rabitə addiyə rabitə ni ijən təsdiğış karde: İron və İraği rabitəon, 2 qılə milləti bovəon iyən etığadonədə rişəş heste.
İron İslom Respublika prezident ijən əlovəş karde: İronədə İraği iminnə vəziri iştirok, 2 qılə kişvəri rabitəonədə qıləy muhimmə noğtəy və be şək 2 tərəfiyə muzakirəon karde bəzne rabitəon inkişofədə barzə ğədəm bə hisob bıbu.
Im mıştərəkə xəbəiyə iclosədə İraği İminnə vəzir, Muhəmməd Şəya Əlsudani həm de terrorizm iyən mıtşəkkil cinoyəton mabarizə bardeyro bə məntəğə kişvəron həmkoəti təkidış karde və votışe: İraği hukuməti siyasət ıme ki ım kişvər bə məntəğə kişvəron zərəl-ziyon rosniyero binovrə mərkəz nıbu.
Əlsodani ijən təkidış karde: İraği dıvlət icozə nibədoy ki ım kişvəri zəminiku bə co kişvəron zərəl ziyon varid bıbu.
İraği İminnə vəzir, bə tehron ıştə səfəri barədə votışe ım səfər, İron və İraği torixiyə rabitəon zumandətiro əncom bıə, əv ijən əlovəş karde: İraği millət və dıvlət de DAEŞ terroristiyə qrupi mubarizə meydonədə çı İron İslom Respublika himoyəon hiç vaxt çı viru benibəkay.
Zinə, İraği İ Minnə vəzir Muhəmməd Şəya Əlsudani deştə iğtisodi-siyasi ali heyəti bə ico və de İron İslom Respublika rəsmi şəxson votımoni hədəfi, bə Tehron varid bıə.