Əlcəzirə bə beynəlxalğə cəzo təşkiloti, sionist rejimiku şikoyətış kardə.
Ğətəri Əlcəzirə xəbəiyə şəbəkə de sionist rejimi ərtışi ğıvvon vositə, bə Şirin Əbuağelə şəhodəti xoto, ıştə şikoyəti bə beynəlxalğə cəzo təşkilot iroəş do.
Şirin Əbuağele Ğətəri Əlcəzirə şəbəkə Fələstinıjə jurnalist be ki Milodi 2022 minnə sori Mayə manqi 11 minnə rujədə Baxtəri tanqə Cənin şəhrədə de israili hərbiçi vositə terror və şəhid bıə.
Bə İran Peres aqentiyəti raporti əsos, Əlcəzirə huğuği komandə ım dosiyəku ıştə komilə təhğiğaton əncom do iyən bə tojə məlumaton dast pəydoşon kardə.
Im Ğətəri televeziya şəbəkə votışe: tojə filmon ki ım jurnalisti şəhodətiku bə dast omə vey oşko surətədə nışo do ki işğolçiyə rejimi ərtışi hərbiçion bə çəy və çəy koəkəyon səmt ti ğandəşone.
Şirin Əbuağelə şəhodət ki çand manq çımi bənav bə Baxtəri tanqə Cənin şəhri sionist rejimi ərtışi həmləon film qətey holədə be əncom bıə, qelobal tənğidon iyən vızmətion bois bıə.
