İroni ixracat bə Ərəbiston rovnəğ peydo kardey

De diğğət bə siyosiyə rabitəon icod kardeyro İron və Ərəbistoni rabitəon bino bey, İroni ixracat bə Ərəbiston çand sor be hərəkət mandey bəpeşt, təğribən bə 15 milyon dollar rəsə.

Milodi 2016 minnə sori Yanvari 3minnə rujədə, Ərəbiston bə ım bəhonə ki Tehron iyən Məşhədədə bəzi şəxson ım kişvəri səforət və konsulqəri həmləşon kardə be, de İron diplomatiya rabitə əncomış nıdo.

Tosə bə ısət, İraği paytəxt, Bədadədə İron və Ərəbistoni miyono 5 dıvrə muzakirə bərpo bıə.

Bəğdadədə, İron İslom Respublika və Ərəbistoni aliyə nımoyəndəon miyono 5 minnə dıvrə votımononədə, 2 qılə kişvəri miyono rabitəon tojədən bino bey barədə ruşinə vəoməon bəyon bıə.

Bə Təsnim aqentiyəti raporti əsos, İroni ticarət, məədən iyən sənaye kə xarıci ticorət iyən beynəlxalğə kamissiya uzv, Sed Ruhollah Lətifi votışe: ımsornə (Şəmsi 1401) minnə sori əvvəliku 30 həzo 791 həzo toniku vey əmtəə bə Ərəbiston ixrac bıə ki çəy erj14 milyono 710 həzo 331 dollar be. Dəvardə soronədə 2 qılə kişvəri miyono iyən siyosiyə rabitəon behərəkət mandey bəpeşt, ım miğdor ixracat əlovə bey, kanətiş nıbe.

Lətifi ijən əlovəş karde: dəvardə sorədə, İroni ixracat bə Ərəbiston 42 həzoku həm kam be.

İroni ticarət, məədən iyən sənaye kə xarıci ticorət iyən beynəlxalğə kamissiya uzv ijən təkidış karde: de diğğət bə İron və Ərəbistoni rabitəon nez bey, iyən de İraği vositəçiyəti votımonon zumand bey, 2 qılə kişvəri iğtisodi rabitəon hevuj bey holədəy.

Qomroki nakonə sıxənəvot iyən beynəlxalğə ticorəti koşınos, bə Ərəbistoni İroni ixracati barədə votışe: sori əvvəliku tosə bə ısət, osınə kılçəku bəpeşt, hidroksid Sodyom, be donə anqı , şişə və sığ iyən co qılə məhsulon bə Ərəbiston səmti İroni ixrac bıə məhsulon bə hisob omedə bin.