Əmirəbdullahiyan: İron və Suriyə rabitəon vey çokə şərayitədə ğərorış qətə

İroni xarıci vəzir bə Suriyə prezidenti dəvət işorəş karde ki bə Dəməşğ səmti səfər kardeyro İron İslom Respublika prezidentiku dəvətış kardə iyən votışe: 2 qılə kişvəri rabitəon vey çokə şoroyetədə ğərorış qətə.

Bə İran Peres aqentiyəti raporti əsos, zinə şəvədə İroni xarıci vəzir, Huseyn Əmirəbdullahiyan de Suriyə xarıci vəzir Feysəl Meğdadi votımoni bəpeşt, qıləy mıştərəkə xəbəiyə iclosədə, dəmeşğədə iştirok kardeyro ıştə rizoyəti nışoş do iyən votışe: 2 tərəf ıştə həmmə cəhdon əncom bədon ki vəomeyədə İron İslom Respublika prezident, seyd İbreym Rəyisi səfəri bə Suriyə şəroyet icod bıbu.

Əmirəbdullahiyan ijən əlovəş karde: de Feysəl Əlmeğdad vindemonədə həm  dıvləti iyən ğeyri dıvləti baxşonədə 2 qılə kişvəri iğtisodi və ticori rabitəon əlovə bey royon barədə votımonon bəyon bıə.

İroni xarıci vəzir həmçınin kali mediyaonədə muntəşir bıə xəbəon ki İron və Suriyə iğtisodi təvafuğnoməon icro beyədə,2 qılə kişvəron ixtilofon bois bıə ki ım təvafuğnoməon icro bə təxir dəğandə bıbu həm votışe: İron və Suriyə rabitəon vey çokə şəroyetədə ğərorış qətə və ımruj Suriyə prezident həm təkidış kardə ki 2 qılə kişvəri rəhbəron irodə bə har çəxtə rabitəon inkişofin doey cəhətədəy.

Əmirəbdullahiyan ijən bəyonış karde ki İron və Suriyə miyono veyə sənədon imzo bıə və icro bey holədəy, ijən təsdiğış karde ki 2 qılə kişvəri miyono hiç qılə ixtilof ni.

İroni diplomatiki təşkiloti yol ijən təkidış karde: ımruj de Suriyə xarıci vəzir təvafuğ bıə ki 2 qılə kişvəri stratejikə dırozmıddətə həmkoətion sənəd hozzo bıkəmon iyən nezə vəomeyədə ım təvafuğnomə bə imzo bərəse.

Əmirəbdullahiyan ijən Suriyə və Tırkiyə votımonon barədə, bə qıləy muhimmə soal cəvobış do və votışe: İron de Suriyə və Tırkiyə muhimmə rabitəş heste.

İroni xarıci vəzir ijən bəyonış karde ki bəpe bə kişvəron hakımiyət və ərzi təmamiyyət diğğət bıbu və təkidış karde: Tehron vey xuşhale ki İron, Tırkiyə və Suriyə prezidenton votımonon və diplomatiki cəhdon bois bıə ki votımonon canqi əvəzi bıbu.