Əmani: İroniro Livani vırə vey muhimme
Livanədə bıə İroni səfir bə Livan kişvəri İroni xarıci vəziri səfəri əhəmiyyət işorəş karde iyən təkidış karde: İroniro Livani vırə məxsusə əhəmiyyəti soybe.
İron İslom Respublika xarıci vəzir Huseyn Əmirəbdullahiyan ki dəvardə Pencşəmbə rujədə, və bə Livani xarıci vəziri dəvəti əsos bə Beyrut varid bıə, Cımə rujədə de Livani rəsmi şəxson əcumlə çı iminnə vəzir, xarıci vəzir, parlamenti yol iyən Hizbullah sərkatibi vindemon iyən votımonış karde.
Əmirəbdullahiyan, Livani bəpeşt, bə Dəməşğ şə.
Livanədə bıə İroni səfir, Muctəba Əmani de İran Peres aqentiyəti raporti jurnalisti mısohibədə votışe: xarıci vəziri səfəri çərçivədə, İron və Livani miyono məşvərəton əncom bıə.
Livanədə bıə İroni səfir, bə Əmirəbdullahiyani vindemonon de Livani parlamenti yol, xarıci vəzir iyən iminnə vəzir işorəş karde iyən votışe: ım vindemononədə, muğaviməti mehvər və məntəğə təhəvulaton barədə vey muhimmə muzakirəon əncom bıə ki ım sıhbəton məntəğəro vey muhimmin.
Əmani ijən Livanədə stansiya bə istesmor rəseyro bə İroni təklifi işorəş karde iyən votışe: ım təklif dırozə torixış heste ki Livani muxtəlifə dıvləton bə xarıci təziğon xoto, həmkoəti azı nıbin, ısət həm prezidenti nıbey vey yolə probleme və ısətnə dıvlət həmmə koon əncom doey çəy ixtiyorədə ni, və həmmə ım məsələon stansiya təsis bey ko bə təxir dəğandey bois bəbe.
