Ərəbiston bə Suriyə milləti insoniyə koməkon vığandeyku himoyətış kardə

Ərəbistoni xarıci vəzir votışe: ıştə kişvər Suriyə millətiro insoniyə koməkon vığandeyku himoyə kardedə.

Fevrali 6 minnə rujədə, Dışəmbə sıb, qıləy buməlarzə bə 7.8 rişter yoləti, Tırkiyə cənub iyən Livani şərğ və Suriyə şimol kişvəron larzedə. Həminə buməlarzə cərəyonəəd ki tosə bə ısət çand həzo nəfər ğıboni bıən, bə binaon həm veyə zərəl-ziyanon varid bıə.

Tosə bə ısət həminə buməlarzə kıştə bıə kəson mığdor, Tırkiyə və Suriyədə bə 30 həzo nəfəriku vey rəsə iyən zəxmin bıə kəson mığdor həm vey elan bıə.

Həminə buməlarzə cərəyonədə həmçınin bə binaon veyə zərəl-ziyon varid bıə iyən nicot komanaon həmonə kəson ki binaon jinədə mandən, nicot doey holədən.

Bə Ələrəbiyə kanali sayti raporti əsos, Feysəl İbne Fərhan ki Brusselədə bə Avropa ittifoği mərkəz şedə be, Dışəmbə rujədə təkidış kardə: buməlarzə faciədə lozime ki həmmə kişvəron ıştə cəvobi bıdən,və həmmə tərəfonku tələbımon kardə ki bə Suriyə həmmə məntəğəon imdod və komək rosniyero ıştə həmkoətion nışo bıdən.

Ərəbistoni xarıci vəzir ijən votışe: tosə həmonə zəmon ki zumon bıbu, Suriyə daxılədə və bə çəy həmmə məntəğəon komək rosniyero, çəmə həmmə cəhdon əncom bədamon.

Şəmbə şəvədə Suriyə təyyorəon təşkilati yol, Basem Mənsor xəbəş do ki ıştə kişvər roziş heste ki Dəməşğədə, Ərəbistoni koməkon təyyorə ğəbul bıko.

Əv ijən votışe: Ərəbistoni Sıə Hiloli cəmiyət Dəməşğədə Ərəbistoni koməkon təyyorə nıştey tələbış kardə ki  dəy muvafiğət bıə.

Im koməkon nıışo dodə  ki  tədrici surətədə Ərəbistoni rabitə de Suriyə vey çok bey holədəy.

Milodi 2011 minnə sori,(1389 minnə sori Esfəndə maqədə) de Suriyə bıhroni bino bey həmzəman, Ərəbiston iyən kali Ərəbi kişvəron Əsədi muxalifə vey muhimmə himoyəkə qrupon xətədə ğərorışon qətə və Dəməşğədə ıştə səforətxonəon bəyon dəbastəşone iyən de Suriyə ıştə rabitəon ğətışon kardə.