Ali Sadığ: İron de İraği həmkoəti inkişof doey dumoədəy

Bəğdadədə bıə İroni səfir, bə Tehron və məntəğə kişvəron miyono bıə votımononədə İraği konstruktivə roli ifo kardey xoto, təşəkkurış kardə iyən votışe: İron de İrağ həmkoəti inkişof doey dumoədəy.

Asiya ğərb məntəğə ərəbə kişvəron miyonədə, məzhəbi, mədəni cəhəto, İrağ de İron veyə mıştərikə noğtəonış heste.

Hamsuyəon miyono, vey dırozə marzi soyb bey(zəmini marzi cəhəto, təğribən 1258 kilometr və ovi cəhəto 351 kilometr), irğ, torix, zıvon, dini mıştərəkəçiyon, əmniyyəti və iğtisodi mıştərəkə mənafe, əcumlə İron və İraği əloğəonədə vey muhimmə nuktəonku bə hisob omeydə.

Milodi 2022 minnə sori Martə manqi 21 minnə rujiku tosə Milodi 2023 minnə sori Yanvari 20 minnə sor, İron və İraği ticorəti miğdor, təğribən 9 milyon dollar be və həminə mıddətədə, İroni ixracat de 23 faiz ozavziyə, bə 8 milyardo 927 milyon dollar və İrağiku daxil bey de 84 faiz kam bey bə 146 milyon dollar rəsə.

Bəğdadədə bıə İron İslom Respublika səfir Muhəmməd Kazım Ale Sadığ tojədən təsdiğış karde: 2 qılə kişvər,  ticori, enerji və nəğliyot baxşonədə iğtisodi cəhəto de yande həmkoətişone ijən mədəni baxşonədə həm həmkoətişon heste ki İron pidəşe bə ım həmkoətion əlovə bıko.

Ale Sadığ ijən əlovəş karde: siyasi cəhəto, İron İslom Respublika və məntəğə kişvəron miyono konstruktiv muzakirəon və votımononədə İrağ vey muhimmə rolış be.

Bəğdadədə bıə İroni səfir ijən bəyonış karde ki İraği vəziyət çok bey holədəy, ijən əlovəş karde: məntəğədə İraği rol, çı inkişofi cəhətədəy və İron həm ıştə həmmə cəhdon əncom dodə ta məntəğədə sulh və əmniyyət icod bıbu.