Əmirəbdullahiyan: sionist rejim məntəğəro vey yolə təhdide

İroni xarıci vəzir, Huseyn Əmirəbdullahiyan de İordaniya xarıci vəzir İmen Əlsəfədi telefoniyə votımonədə Şərifə Ğudsədə muğəddəsə vırəon və Fələstini millətiku İordaniya himoyəon və cəhdonku ğədrdonətiş kardə və votışe: İslomi ummət və məntəğəro sionist rejimi apartayd rejim vey yolə təhdid bə hisob omeydə.

Bə İrna raporti əsos, Pencşəmbə əsrədə Huseyn Əmirəbdullahiyan de İmen Əlsəfədi məntəğə və 2tərəfiyə baxşonədə və vey muhimmə mevzoonədə 2 qılə kişvəri cəhdon barədə de yande telefoni votımonışon kardə.

Əmirəbdullahiyan bə İslom dınyo vəhdəti zərrurət və Məçituləğsa məçitiku sioniston dasti kırt kardey və Fələstini həxon komil surət qətey təkidış kardə.

Əv ijən çand vaxt çımiku bənav bə İordaniya ıştə səfəri işorəş kardə və 2 qılə kişvəri miyono həmkoətion və rabitəon inkişofiro İroni hozzoətiku xəbəş do.

Im telefoniyə votımonədə İordaniya xarıci vəzir həm Fitrə idi dəme mınosibəti bə İroni millət və devlət təbrik votışe və 2 qılə kişvəri miyono rabitəon hevujətiro Əmani hozzoətiku xəbəş do.

İmen Əlsəfədi ijən təkidış kardə: məntəğədə İron vey muhimmə kişvəre və de İroni rabitəon hevujəti əməro vey muhimme.

Əv ijən İron və Ərəbistoni rabitəon bəji kardeyku ıştə himoyəon elanış kardə və ım muhimmə təhəvuli təbrik votışe.

İmen Əlsəfədi həmçınin Fələstini milləti həxonro sioniston təcavuzkorə hərəkəton vədə, İordaniya himoyəon elanış kardə.