Əmirəbdullahiyan: sioniston, mediya koəvononku nifrətışon heste

İroni xarıci vəzir, Huseyn Əmirəbdullahiyan, bə Ğəzzə canqi mediya koəvonə şəhidon barzə rofi ehtırom noey bəpeşt, votışe: sioniston, mediya koəvononku nifrətışon heste

Bə İrna raporti əsos, Deşəmbə şəv Huseyn Əmirəbdullahiyan ıştə İKS nomo səhifədə nıvıştəşe: bə Ğəzzə milləti ələyh, zalımonə canqiku 3 manq dəvardedə və 111 nəfər, jurnaliston və operatoron şəhid bıən ki tole torixədə, ım statestika stajış nıbe.

Əv ijən əlovəş kardə: soniston de şiddətin dınyo oqohətiku tarsedən və ım vey yol amile ki ım cinoyətkorə rejim, mediya koəvononku nifrətış bıbu.

Əmirəbdullahiyan ijən bə mediya koəvonon barzə məğomi ehtırom noşe iyən bə Fələstini ğəhrəmonə jurnalist, Vael Əldəhdoh  şəhodəti təsliyət votışe.

İşəmbə rujədə, Xan Yunesi ğərbədə, Əlcəzirə televeziya kanali jurnalist,  Vael Əldəhdoh  iyən ozodə jurnalist, Mustəfa Sorəya de sionist rejimi həmlə cərəyonədə şəhid bıən.

Sionist rejimi ərtışi səmtiku de 2 nəfər Fələstini jurnalisti şəhodət, Ğəzzə tanqə canqədə jurnalistə şəhidon miğdor bə 111 nəfər rəsə.

Çımiku bənav, Ğəzzə tanqə bombardımonədə, Vael Əldəhdoh zoə, Həmze həm, ıştə həyothəmro, 2 qılə hırdən və nəve dastiku doəş be.

Ğəzzə tanqədə devləti məlumatərosnə ofis de qıləy bəyoniyə muntəşir kardey vositə, de sionist rejimi hərbiçiyon vositə, ım 2 nəfər Fələstini jurnalisti şəhodəti mhkumış kardə və həmmə mediya, jurnalist və huğuği ittifoğonku tələbış kardə ki Ğəzzədə etosniye oqəteyro, sionist rejimi təziği jiədə ğəror bıdən.