Briqada qeneral Şikorçi:İron har ruj bəsə navnəsə zumand beydə

İroni Silohinə Ğıvvon Sər Ğərorqo Mədəniyyət və Namə Canqi sahədə Sər Ğərorqo rəyisi muavin bə kişfəri rəketi ğabiliyyəton dəvominə surətədə çok bey işorə karə holədə,çe İron İslom Respublika bın sahədə har ruj həni həm zumand beyış bəyon kardə.

İroni Silohinə Ğıvvon Sər Ğərorqo Mədəniyyət və Namə Canqi sahədə Sər Ğərorqo rəyisi muavin,briqada qeneral Əbulfəzl Şikorçi cımə ruji bə Mehr Xəbə Aqentəti doə musahibədə çe İroni rəketi ğabiliyyəton dəvominə surətədə çok beyış bəyon kardə və votəşe:Əmə bın sahədə har ruj bə nav şeydəmon və mıtləğən ımruj bəsə zinəsə,maşki həm bəsə ımrujisə vey zumand bəbemon.

Bə "Pars Tudey" doə məlumoti əsos,Əv,bə İslomi İnğılobi Mıhofizə Korpusi Aerokosmik Ğıvvon şəhidə komandiron,ə cumlə həm bə Şəhid Qeneral Həsən Tehroni-Mığəddəm və Şəhid Qeneral Əmir-Əli Hocizodə bə İslomi Respublika rəketi strukturon icod beyədə bıə həlləkə roli işorə kardə holədə əlovəş kardə:Şəhid Tehroni-Mığəddəm çın zu binovrəş noe və çe İroni bo ın sahədə barzətiro platformaş one.

Sərdor Şikorçi bə şəhid Tehroni-Mığəddəmi imoni xosyəton və cihodi rufi təkid kardə holədə votəşe:"Rəketi fəoliyyətonku vey vocibə çi,çın şəhidi imon iyən mehkəmə əğedə be ki,ım həm bəy har qıləy loyihə de səbarzəti bə oxo rosney imkonış doe və əmə ımruj çın bovəon iyən səyon bəhrə vindedəmon."