Mosulədə Daeşi uzvonku 120 nəfər həlok bıən.

İraği de terrorizm mubarizə əkə ğıvvon sıxənəvot Mosuli ğərbədə 120 nəfər çı Daeş terroristiyə qrupi uzvon həlok beyku xəbəş do.

Bə İrna raporti əsos Səbah Əlnoman votışe: ısət Daeş fəğət çı Mosuli ğərbədə qıləy 3 kilometeriyə qədə vırədə heste və əyo mıhosirə bıə.

İraği de terrorizm mubarizə əkə ğıvvon sıxənəvot əlovəş kardə: Daeşi uzvon ısət fəğət Əlşəfa və Əlzəncili məntəğəon ijən çı Mosuli ğədimiyə hissəku bəzi vırəonədə huzurışon heste.

Xəbə omə ki Əlzəncili məntəğədə əməliyaton dəvomış heste və İraği ğıvvon bə ım məhəllə nıfuzışon kardə.

Daeş terroristiyə qrupi dastiku çı Neynəva ostani mərkəz Mosuli ozod karde əməliyat dəvardə sori Oktiyaberiku bino bıə və ısət bə oxonə mərhələon rəse.

İraği dovtələbə ğıvvon, hərbion, polis, əmniyyətiyə ğıvvon və pişmərqə nomo bıə kırdə ğıvvon ıştə ım əməliyatədə əvvəl Mosuli şərğiyə məntəğəşon ozod kardə və ısət bə ğərbiyə məntəğə ozod karde rəsəşone.

Daeş çı Amerkə, siyonist rejim və Ərəbiston iyən bəzi kişvəron tərəfiku pesoxtə bıə terroristiyə qrupe.