Ayətullah Əraki: Xıdo Rəsul(s) yod və nom vəhdəti amile.
-
Rəbiul-Əvələ manqi 12 detosə 17 minə ruj vəhdət nomo bıə haftə vıjinə bıə.
İslamiyə məzhəbon miyono təğrib beynəl xalğiyə icma rəis İslam Dini Yolə Peyğəmbəri vıcudi çı islamiyə umməti dılədə vəhdəti icod əkə zınəş be.
Ayətullah Muhsen Əraki de İsna aqentiyəti mısohibə cərəyonədə ijən islam dınyoədə vəhdəti barde təkidış kardə: bə vəhdəti rəsey xoto mısılmonon bəbe çı həmməy mehribançiyətiyon Rəsuli dəstor iyən əmri roədə hərəkət bıkun.
İslamiyə məzhəbon miyono təğrib beynəl xalğiyə icma rəis şiə və sınnion miyono vəhdətiku hədəfış ixtilafon bə kəno noe ijən mıştərəkə mıvzoon bardə həmkari və təvafuğ məxsusə islam dınyo və beynəl xalğ sahədə zınəş be və təsdiğış kardə: jıqonə ixtilafon deşmənon vədə islamiyə bıvəti və vəhdəti mane ni.
Ayətullah Əraki təkidış kardə ki bo mısılmonon miyono vəhdəti icod karde xoto islam dini peyğəmbəri moəku bıə ruji mərasimon dəvoniye karde bəzne vey çokə təsirış bıbu ijən çı vəhdəti əsos və rişə Həzrəte Muhəmməd(s) şəxsiyəte.
İslamiyə məzhəbon miyono təğrib beynəl xalğiyə icma rəis ijən bəzi iştimaiyətonədə bə DAEŞ təfəkur(əğidə) iyən vindemoni vıcud işorəş kardə və votışe: məntəğədə DAEŞ-i məhv karde bəpeştə ısət hərbiyəmıvzoon əhəmmiyətış ni bəlkəm alimon, hınə soyibon, mediyaədə fəalon və dınyo həmmə ozodə kəson bəbe səy və cəhdışon bıbu ta DAEŞ-i əğidə iyən ideoloqiya məhv bıbu.
Bə Sınnion bovəon əsos zinə yəni Rəbiul-Əvələ manqi 12 çı islam dini yolə peyğombəri milad ruji ğeyd bıə be əmmo şiə rəvayətonədə ım mınosibət bo Rəbiul-Əvəli 17 minə ruji ğeyd bıəş
De İroni nizomi təsis əkə mərhum İmom Xomeyni(r) tədbiri bərobər ijən sınni və şiə mısılmonon miyono vəhdəti çımiku vey ziyod kardero Rəbiul-Əvələ manqi 12 detosə 17 minə ruj vəhdət nomo bıə haftə vıjinə bıə.
