İronıjə nat tankerədə 2 qılə tojə cənozə peydo be.

İmdodiyə ğıvvon Çini ovonədə bıə İroni nat tankerədə 2 qılə tojə cənozə peydoşon kardən.

Bə İrib raporti əsos Çini imdodiyə ğıvvon ımruj bə İroni otəş qəte nat tankeri daxil bey bəpeştə 2 qılə tojə cənozəşon peydo kardən əmmo vəziyəti bevəc bey xoto nim saət əməliyati bəpeştə kəştiku xaric bıən.

Eyne holədə elan be ki İroni məxsusə ğıvvon bə kəşti daxil beyru hozzo bıən ki vəziyəti çok bey bəpeştə ıştə nicot əməliyati bino kardən.

Zinə İroni imdod və nicot fərmondə Əlireza Nuruzi Çini şərği sahilədə de 6 qılə kəşti nat tankeri otəşi okoşteku xəbəş do.

Imrujnə sıbi faxtədə həm İroni ko, iştimaiyə rifoh iyən təavon vəzir bə Şanxay varid be ta İronıjə dıyovonon oxonə vəziyəti barədə nıziku əməliyati hidoyət bıkə.

Əli Rəbie rə de Çini rəsmi şəxson qıləy iztiroriyə iclosi bərpoş kardə.

Xəbə omə ki İroni ərtış ğıvvon sıxənəvot həm İroni dıyovonon və kəşti heyəti nicot doero Çin və Yaponiya ərtışiku tələbış kardə ta bə İroni imdod və nicot ğıvvon komək bıkən.

Isət bo İroni məxsusə ğıvvon nicot əməliyati bino beyro bə Çin və Yaponiya hərbiyə ğıvvon komək ehtiyoc heste.

Yanvari 6 Çini dıyoədə qıləy bo kəşti bə İroni nat tanker qıniye xoto çəy otəş qəte boyis bıə ki çı kəşti 30 qılə dıyovononku hələ hiç xəbə ni.

İronıjə kəşti çand ruje ki otəşədə sutedəy.