Zərif de Tacikistani prezidenti didorış kardə.
İroni xarıci vəzir zinə ruji Deşənbə şəhrədə de Tacikistani prezident didor və sohbətış kardə.
Muhəmməd Cəvad Zərif ki bə Tacikistan səfərış kardəy deşənbə ruji de Tacikistani prezident İmaməli Rəhman didorış kardə və bə dıtərəfə mınosibəton həmmə zəminəonədə hevujəti təkidış kardə.
İroni xarıci vəzir və Tacikistani prezident ım didorədə bə 2 qılə kişvəri mıştərəkə noxtəon işorəşon kardən və ijən bə 2tərəfə həmkarion muxtəlifə baxşonədə əcumlə siyasi, iğtisodi, mədəniyəti, enerji və texnoloqiyədə təkidışon kardən.
İroni xarıci vəzir de siyasi heyəti bə ico və bo ECO ozvə kişvəron xarıcə vəziron 23-nə iclosədə iştirok kardero bə Tcikistoni paytəxt varid bıə be.
ECO ğıləy məntəğəiyə təşkilat heste ki 1985-nə sorədə İron, Pakiston və Tırkiyə tərəfiku de iğtisodi, texniki və mədəniyəti həmkarion hədəfi ozv bıə kişvəron miyono təsis bıə.
İron, Tırkiyə, Pakiston, Əfğanestan, Tırkmniston, Ğırğızıston, Ozbəkiston, Ğəzaxıstan, Tacikistan və Azərbaycan Respublika ECO iğtisodi həmkari təşkilati ozvonku bə hisob omedən.
