Dınyo mısılmonon Rujə id ğeyd kardışone

Mısılmonon mubarəkə Rəməzonə manq bə orəx rəse. Ayətullah Seyyid Əli Xamenei dəftərxonə xususiə komitə Şəvvalə manqi daxil bıe ğeyd kardışe, ımən de miladi təğvimi bə iyuni 15 -minə ruj eqınedə.

De Rujə idi dame munasibəti İİR Prezident Həsən Ruhani bə mısılmonə umməti təbrik votışe. Tehronədə de Ali Rəhbər Ayətullah Xamenei imomiəti Rujə idi nomojvotə mərasim dəvarde.

Im id həmə dınyo mısılmonon de yolə izdihami ğeyd kardışone. Rusiyadə ki, 20 milyonisən vey mısılmonə şəhrıvandış heste, Prezident Vladimir Putinı əvonış təbrik karde, votışe ki, ım foydəmandə ənənə bə yolə hurmət və dastəqi layığe.

Avropa mısılmonon Almaniya, Avstriya, Fransa, Yolə Britaniya və həniən co məmləkətonədə Rujə id de əzəməti ğeyd kardışone. "A24.az" sayt Birminhem şəhərədə 140 həzo mısılmoni Fitrə nomoji vote ro bə şəhəri məciton səbəro bıe barədə nıvıştışe. Məcitonədə vırə nıbe səbəbiku, əvon şəhəri park və boğonədə ım mərasim icra kardəşone. 

Az.R -ədən Naziron Kabineti iyunə manqi 15 və 16-minə rujon id elan kardəşe. De istirahətə rujonən əlavə tosə iyunə manqi 19-minə rujən daxil məmləkətədə Rujə idə tətil bəbe. Respublika həmə məçitonədə Fıtrə nomoj votəşone. Ən İzdihaminə mərasim Boku "Fatiməye Zəhra" məcitədə dəvardə. "Tojəpir" məçitədə de şeyxulislam Allahşukur Paşazadə imomiəti Rujə nomoj votəşone. Ey bə jurnaliston votəşe ki, məmləkətədə dini məzhəbon arədə tərəfkeşəti ni. Çəmə nomojon həmişə bə ico dəvardedə, həmişə bahəm vəhdətə nomoj votedəmon.