Nyu- Yorki mısılmonon Aşura şemon təşkil kardəşone

Çe Amerika İbə Ştaton Nyu-York şəhəri İmom Huseyn (ə) aşiğon bı rujonədə qıley izdihaminə şemon dəvuniəşone. “Maide.az” sayt bə İQNA istinadən xəbə doəşe ki, ım şemon şəhəri Manhatten rayonədə təşkil bıə. Əhli-Beyt (ə) tərəfdaron de “ləbbeyk ya Huseyn” şuari Məhərrəmə manqi əzadarəti ğeyd kardəşone. İron, Əfğanıston, Pakiston, Hindiston, İrağ, Livan mənşəninə Əhli beyt (ə) aşiğon kuçədə nomoj votəşone, mərsiyyon handəşone, dini şuar və pərcəmon numayiş kardəşone.

İm əzadariə tədbirədə iştirakəkon bə muxbiri votəşone ki, “əmə koncoən bıbəmon İmom Huseyn (ə) məhəbbət həmişə çəmə ğəlbədə bıəbe”.

İm curə əzadarə şemon çe Kanada Vankuver şəhəri Əhli-Beyt (ə) tərəfdaronən dəvuniəşone. Aşura ruji, yəni sentyabri 20-ədə Toronto şəhərədən əzadarə şemon təşkil karde nəzərədə qətə bıə.

Hindistani Sər vəzir Narenda Modi İndoor şəhəri məcitədə təşkil bıə İmom Huseyn(ə) əzadarə məclisədə iştirak kardəşe. “Faktxeber.com” sayti məlumat doəşe ki, Sər vəziri ıştə nitğədə votəşe ki, İmom Huseyn(ə) bə nohəxi və zulmi əleyh usyan kardəşe. İmruj bəşəriyyəti bə çey məktəbi ehtiyacin bıe dərk kardedəmon, ruj bome Əhli-Beyt (ə) tərəfdaron təbliğ kardə mənəviyyati əhəmiyyəti həmə dınyo çəmiyyət çok dərk bəkarde.”

Əmo Əhli-Beyt (ə) əleyhdaron ıştə deşmenə hərəkətonku hələən omandedənin. Əfğanıstoni Milliə Əmniyyətə ğıvvon bı Məhərrəmə əzadariə rujonədə 26 nəfər DAİŞ-i terrorə qrupi uzv dəstqir kardəşone. Əvon Kabil şəhəri əzadarə tədbironədə terrorə hucumə planon icra karde nısığ hestışonebən.