Ruhani: beynəl xalğiyə muğaviləonədə Amerkə ğəyri ğanuniyə rəftoron bəyon bəbe.

İroni prezident votışe: İ Bıə Milləton təşkilati umumiyə icma ımsornə iclosi fırsətiku bo beynəl xalğiyə muğaviləon xususi ətomiyə sazişədə Amerkə ğəyri ğanuniyə rəftoron bəyon karde istifodə bəbe.

Həsən Ruhani ımruj sıb bə Niyuyork varid bey vaxti jurnaliston cəmədə votışe: Amerkə dıyoədə ıştə vey pəymononku xaric bıə və bə muğaviləon əcumlə ətomiyə sazış əməlış kardə ni.

Ruhani təsdığış karde: ım iclosədə iyən çı Niyuyorki muxtəlif qırdbemononku çəmə hədəf ıme ki dınyo iyən məntəğədə İroni siyasəton bəyon kəmon.

İroni prezident, ımsornə bə Niyuyorki səfər karde cərəyonədə İ Bıə Milləton təşkilati umumiyə icma iclosədə nıtğ karde bə kəno, bə Nelson Mandella məğomi ehtırom karde məxsusə iclosədə həm səhbət bəkarde.

De Niyuyorkədə bıə media mudiron, xarıci siyosəti elitaon və Amerkə İslomiyə təşkilaton lideron vindemon iyən muzakirə karde İroni prezidenti ım səfəri co bərnaməonin.

Çı Ruhani bə Niyuyork səfər kardə heyəti dılədə İroni xarıci vəzir Muhəmməd Cəvad Zərif və çəy siyasi muavin Əbbas Ərağçi həmçnin İroni prezident aparati sədr Məhmud Vaeezi və çəy siyosi muavin Məjid Təxtrıvançi həm hestin.